Online Reporter
Mthokozisi Ncube
KUBOTSHWE umfana oleminyaka engu-19 yokuzalwa wakoBulawayo ngemva kokuba amapholisa ethole isidumbu senkomo esanda kuhlatshwa, ingqamu eziyisikhombisa ezilegazi, ihloka kunye lebhemba phakathi kwemota yohlobo lweHonda Fit kuMguza Roadblock, okucatshangelwa ukuthi yinkomo etshontshiweyo.
Ukubotshwa lokhu kwenzekale ngesikhathi amapholisa eqhubeka eqinisa umkhankaso obizwa ngokuthi Operation “Batai Mbavha Dzemombe Nembudzi” (Bambani Amasela Enkomo Lembuzi), oqondiswe ekuqedeni amasela ezifuyo kanye lokulwisa ukuthengiswa kwenyama engekho emthethweni.
Ngaphansi komkhankaso lo sokubotshwe amasela enkomo amanengi, kwavalwa amabhutsha edlula i-200 angekho emthethweni kwabotshwa lamakhefa edlula i-100 aphambanisa indlela ezibekwe emthethweni zempilakahle zokubanjwa kwenyama.
Isikhulumi samapholisa uInspector Nomalanga Msebele uqinisekise ngokubotshwa kuka Erick Masuku (19) ohlala eGwabalanda osolwa ngecala lokutshontsha inkomo.
Ngokutsho kwamapholisa, isehlakalo lesi senzakale ngehola lika 10.30 ebusuku mhlaka 28 Ntulikazi ngesikhathi amapholisa ekuMguza Roadblock.
Kubikwa iHonda Fit le ebiqonde koBulawayo ifike emapholiseni ilomtshayeli kunye labanye abantu ababili phakathi. Imota le isimisiwe, umtshayeli ubuzwe ichence lakhe.
Amapholisa athe elokhu esithi afuna ichence, akade bephakathi ababili beqe baphuma emoteni badliwa ngumnyama, umtshayeli laye uke wazama ukubaleka kodwa waphanga wabotshwa.
Ekuhlolweni kwemota, yikho lapho okutholakale khona isidumbu senkomo, ibhemba, ihloka kunye lengqamu eziyisikhombisa ezilegazi, okwenze amapholisa asola ukuthi inyama le ingabe ingeyenkomo etshontshiweyo.
Ekubuzisisweni uMasuku ubikele amapholisa ukuthi yena ucelwe ngababili ababalekileyo ukuthi abathwale njalo inyama uyithethe egangeni eliseduzane lesitolo sakoGreens Shops eNyathi.
Amapholisa asedinga ababili ababalekileyo.
Ukubotshwa lokhu kuza ngesikhathi amapholisa eseqinise umkhankaso elizweni lonke wokulwisa ukutshontshwa kwezifuyo emaphandleni, inyama ibisihanjiswa emadolobheni ukuze iyethengiswa ngokungekho emthethweni.
Amapholisa axwayise uzulu ukuthi angathengi inyama ebantwini abangelamachence ngoba lokhu kuyingozi kumpilakahle.
Uphenyo luyaqhubeka, njalo amapholisa athi imizamo yokudinga lokubopha abasolwa ababili ababalekileyo iyaqhubeka.
