Online Reporter
Peter Matika
UMSEKELI kasodolobho wakoBulawayo, ukhansila Edwin Ndlovu, usebotshiwe njalo, kulandela insolo zokuthi wacela imali engange-US$52 000 komunye usomabhizimusi ukuze kungesulwa isivumelwano sokusebenzisa enye indawo esedolobheni.
UNdlovu ubotshwe ndawonye lokhansila kaWard 28, uNtandoyenkosi Ndlovu lomunye owake waba ngukhansila kaWard 22, uRodney Jele, kulandela uphenyo olwenziwe yiZimbabwe Anti-Corruption Commission (Zacc).
Isikhulumi seZacc, uSimiso Mlevu uthe abasolwa laba babotshelwe icala lokucela imali okungekho emthethweni.
“IZimbabwe Anti-Corruption Commission iyakuqinisekisa ukubotshwa kukamsekeli kasodolobho wakoBulawayo u-Edwin Ndlovu, lokhansila kaWard 28 uNtandoyenkosi Ndlovu lomunye owake waba ngukhansila kaWard 22, uRodney Jele, ngecala lokucela ukufumbathiswa imali kulandela isivumelwano seminyaka engu-50 sokusebenzisa indawo yokwakha ihotela,” kutsho uMlevu.
Uthe uphenyo luveze ukuthi ngoNcwabakazi 2026, abathathu laba bacela usomabhizimusi imali engange-US$52 000 ukuze bangesuli isivumelwano ayesenze lekhansili ngoMbimbitho ka-2023.
“Abathathu laba kuthiwa batshela umamangala ukuthi kukhona omunye usomabhizimusi owayethembise ukubanika i-US$52 000 ukuze isivumelwano leso sesulwe, basebemtshela ukuthi kumele laye akhiphe imali efanayo ukuze aqhubeke esebenzisa indawo leyo.
“Umamangala wabikela iZacc, eyahlela umkhankaso wokubabamba, okucine kusenza babotshwe.”
Abathathu laba bakhangelelwe ukuvela emthethwandaba ngoMvulo.
Ukubotshwa kukaNdlovu kuza kungakapheli umnyaka emiswe emthethwandaba ngecala lobugwelegwele. NgoNcwabakazi ka-2025, wakhululwa kucala lapho yena lokhansila uMpumelelo Moyo ababesolwa ngokucela imali engange-US$20 000 kunkampani yeLabenmon Investments.
