Londile Moyo
Ethel Ncube
ZIBANJWE xhaka izigelekeqe ezine ezisolwa ngecala lokubulala enyew indoda eMberengwa ngeviki ephelileyo.
Kuvele ukuthi kubotshwe abantu abane abasolwa ngecala lokubulala uAlbert Nyoni, obeleminyaka engu-26, ozalwa esigabeni seKadyembeu ngaphansi kwenduna uChireya eGokwe.
Kubikwa uNyoni wabulawelwa eChabudapasi Tuckshop, eMberengwa, ngoLwesine mhlaka 14 Nkwenkwezi 2026 ngezikhathi zabo-11 ebusuku.
UNyoni wayenatha utshwala eChabudapasi Tuckshop elabanye ometheswacala abane ababalisa uBlessed Hove oleminyaka engu-24, Asalam Shoko oleminyaka engu-30, Tertience Ncube oleminyaka engu-25 bonke abangaphansi kwenduna uBvute, eMberengwa, loTison Zinaka oleminyaka engu-24 oweGwenhamo ngaphansi kwenduna uShumba eMasvingo.
Kubikwa kwaba lokuxabana phakathi kwabo, abasolwa bamthelela bamtshaya waze wawela phansi.
Amapholisa afika endaweni okwakutshayelwe khona uAlbert Nyoni amthatha amgijimisela esibhedlela seMberengwa lapho abathi befika khona wedlula emhlabeni.
Abetheswacala abane laba sebesezandleni zamapholisa bancedisa ekuchwayisisweni kwecala lokubulala leli. Kukhangelelwe ukuthi baye emthethwandaba masinyane.
Intatheli ixhumane lesikhulumi samapholisa eMidlands uInspector Emmanuel Mahoko obike ukuba umphakathi kumele ulungisise uhlupho kungelakulwa phakathi ukuze kunqatshelwe ukulahleka kwempilo mahlayana,
“Sichwayisisa udaba lapho u-Albert Nyoni ahlaselwa ngamadoda amane wafa. Abetheswacala basezandleni zamapholisa.
“Sikhuthaza uzulu ukuthi axazulule ingxabano ngendlela elokuthula atshiyane lodlakela ukuze kungabi khona ukulahleka impilo,” kuphetha uInsp Mahoko.
Online Reporter