adminYiNtatheli kaMthunywa
IQEMBU leGhetto Magic alibuyeli emuva ngokudonsa imiklomelo nanko phela liyabusa okwamanje kuligi yomdlalo we-basketball ehlanganisa amaqembu wonke adlalela esabelweni seMatabeleland North.
Ngokuma kweligi yalumdlalo, iqembu leHwange Heats eliphuma eHwange likhokhela ngemiklomelo eyisithupha ngemva kwemidlalo emithathu.
Iligi le ilamathimu abalisa iBlack Hornets, iHwange Heats, iLions, iVictoria Falls leDete Icelanders.
Iphephandaba likazulu libukele umdlalo obuphakathi kweHwange Heats leLions lapho okubemgceke ukuthi abadlali bayo bayazi ukusebenzisa izandla, baligadle ibhola liyewela ebhasikitini.
Abafana beGhetto Magic bayalandela kungalane bephethe imiklomelo emine loba nje kuliqembu elilakho ukuthi lithwale inkezo ekupheleni kwesizini. IDete Icelanders idonsa nzima emsileni wengalane ngomklomelo owodwa.
Unobhala weBasketball Union of Zimbabwe esabelweni seMatabeleland North uPenrick Ndlovu ubike ukuba imidlalo yabo iqhuba kuhle kodwa balusizi ngamaqembu afana leDete Icelanders athwele luklubhu ngokuswela usekelo lokuthi igcwalisise imidlalo yayo.
Uthe balokukholwa ukuthi uhlelo lwabo lokusungula imincintiswano yenkezo luzaphathisa amathimu asadalala njengeDete Icelanders.
“Minengi imincintiswano yenkezo ezadlalelwa edolobheni leHwange ngaphansi kwe-basketball yeMatabeleland North. Sikhangelele ukuthi ezinye izigaba zeMat North zizaphatheka zenelise ukuthi zijulisise ubungcitshi babadlali kulumdlalo.
“Amathimu ethu azimisele ukudlala kodwa iDete Icelanders iyehluleka ukugcwalisisa imidlalo yayo ngoba indubo zinengi kulithimu, silethemba lokuthi kuzaphela lokhu,” kutsho uNdlovu.
UNdlovu uthe bahlele ukuthi babambane lamanye amadolobho ukuze amathimu abo athole imidlalo eminengi yokuncintisa.
“Sifuna ukuthi amaqembu aphuma kumadolobho anjengePlumtree, iLupane leGwanda ahlanganele lathi ngoba lokhu kungenza ukuthi sihuge lamankampani alothando lomdlalo we-basketball.”
Umdlalo we-basketball eMat North ubhekane lodubo lokuswelakala kwenkundla yomdlalo lo.
Ekuqaleni kwalumnyaka inhlanganiso yeBUZ yabika ukuthi nxa ingathola usekelo kumathimu angaphandle kwamadolobho amakhulu, izazama ukudinga amabhola lamambule.Inhlanganiso le iphezulu komkhankaso wokudinga imali yokwakha inkundla ezigabeni ezikhatshana.
Imidlalo ekhona ngoMgqibelo:
Ghetto Magic v Victoria Falls, Lions v Dete Icelanders
Online Reporter