Online Reporter
Zimpapers Sports Hub
LABO abake badla ubhedu kunguqu benza izimanga kuleli, sebenxuswe ukuthi baphatheke kumncintiswano weClash of Legends ka2025 ozaqhutshelwa kweleBotswana ngoNhlangula.
Umncintiswano lo uzadibanisa amaqembu alabadlali abafanayo abeBotswana Legends, South Africa Legends leNamibia Legends.
Imidlalo kubikwa izaqhutshwa ngelanga elilodwa enkundleni ye-Obed Itani Chilume mhlaka 21 Nhlangula.
IZimpapers Sports Hub izwe ukuba iqula labadlali beZimbabwe, inengi kuyilabo abagqoka isikipa samaWarriors, kubikwa lizakhokhelwa nguTinashe Nengomasha.
IBotswana izakhokhelwa nguBoitumelo Mafhoko, uDokkies Schmidt (Namibia) loDikgang Mabalane (South Africa).
Ubufakazi obuphawulwe kumaphephanda aseBotswana kuliviki, buveze ukuba iZimbabwe Legends izadlala leSouth
Africa, kuthi iBotswana yona idlale leNamibia.
Abaqoqi bemidlalo le kubikwa bahlose ukwakha ubudlelwano phakathi kwabadlali abake baligiqa ibhola kubanga eliphezulu.
Ekhuluma mhla kusungulwa ihlandla lemidlalo le, omunye wequla labaqoqi bemidlalo uSekhana ‘Nandos’ Koko uthe lonyaka bafuna ukuthi umncintiswano lo ubemkhulu.
Andubana kudlalwe, kuzavakatshelwa ezikolo, kufundiswa abadlali labaqeqetshi abasakhulayo eBotswana.
Omunye wabadlali bakuleli owake wadlalela eBotswana uCollen Nyambiya uthe ukuqoqwa kwemidlalo enjengale kubalulekile ngoba kuqinisa ubudlelwano lokwabelana ulwazi ngempilo kulabo asebatshiya umdlalo.
“Kuhle ukuthi abadlali abatshiya imbali emazweni la kabakhohlakalanga. Kwandise ukuthi bakhohlakale, amabizo abo akhulunywe kuzindaba nje.”
Abadlali abake badla ubhedu kuleli inengi libonakala kumiqhudelwano eqhutshelwa kunkundla ezisemalokitshini emadolobheni amanengi ngempelaviki kumbe ngesikhathi samakhefu agoqela iPhakisa leKhisimusi.
Isiphetho…
