Online Reporter
Nkosilathi Sibanda
AMALUNGISELELO omkhosi wezicoco zemidlalo kusigaba se-African Union Region 5 asekubanga lokucina njalo kulezizalwane zakuleli ezintathu ezikhethwe ukuncintisela izicoco eziphezulu.
Umkhosi lo, obizwa ngokuthi yi-Regional Annual Sports Awards (RASA) uzaqhutshelwa eHarare mhlaka 24 Nkwenkwezi lapho ozavulwa ngokusemthethweni nguMongameli welizwe u-Emmerson Mnangagwa.
Lo kuzabe kungumkhosi wesikhombisa.
Abakuleli abakumbango wezicoco ngumdlali osakhulayo kukhilikithi yabesifazane uKellis Ndlovu, okhethwe kuhlandla leJunior Sports Person of the Year, uPieter Benade umqeqetshi wamaSables okhethwe kuCoach of the
Year loTapiwa Makarau kuSportsman of the Year lakuSports Person of the Year.
Umaqhuzu we-African Union Region 5, uStanley Mutoya uthe inhloso yokunikeza izicoco kubadlali, abaqeqetshi lezinye izisebenzi kwezemidlalo yikubakhuthaza lokubabonga ngokwenza kuhle enkundleni, kumincintiswano etshiyeneyo.
“Njenge-AUSC Region 5, siyaqhubeka ngokubona ukuthi izicoco ziyinkuthazo njalo zidlala indima ebalulekileyo kubadlali, abaqeqetshi, kunye lalabo abancedisayo. Izicoco zeRASA lezi ziyisitshengiselo zokuzimisela kwethu ekuthakazeleleni ithalenta lokusebenza kuhle kwezemidlalo.
Kusukela yasungulwa, i-RASA isikhule yaba yinkundla ebalulekileyo engacini nje ngezicoco kodwa igqugquzela abadlali ukuthi bazimisele ekusebenzeni okuphezulu,” kutsho uMutoya.
Uthe ukukhethwa kwalobo abazathola izicoco kwasukela emazweni abo, andubana kuqhubeke kusiya kuhlandla lomncintiswano wamazwe ku-African Union Region 5.
Kulequla lentatheli ezifika amatshumi amane, ezisuka emazweni alitshumi aku-AUSC eziphiwa umlan wokuvotela abenze kuhle.
UMutoya ubonga uMongameli Mngangagwa ngokuvuma ukuthi abekhona kumkhosi wesicoco.
“Sibonga kakhulu kuMhlonitshwa, uMongameli weZimbabwe, ophinda abenguMgcinisihlalo we-SADC, u-
Emmerson Dambudzo Mnangagwa, ngokuvuma ukunxuswa. Ngokufanelekileyo, uMongameli uzakwethula isicoco seSports Person of the Year.
Indikimba yezicoco zalonyaka ithi: “Ukuthakazelela ukwenza kuhle lokukhuthaza ukucabanga kakutsha.”
