admin
YiNtatheli kaMthunywa
KUZAGCWALA kuthi phamu kumgwaqo oqonda eBinga ngeviki ezayo kulandwe umncintiswano wakuqala owe-volleyball edlalelwa etshebetshebeni.
Umncintiswano lo uze ngesikhathi uHulumende esethe abezemidlalo bavumele isilinganiso se-30 phesenti sababukeli kumidlalo yonke.
Inhlanganiso yeMatabeleland North Volleyball Association isiqinisekise amalungiselelo emidlalo ye-volleyball edlalwa etshebetshebeni ezaqhutshelwa eBinga ngoLwezi.
Imidlalo le, eqoqwe yiZimbabwe Volleyball Association (ZVA) njalo isabelo seMat North yiso esizasungula isizini yaloluhlobo lwemidlalo ilizwe lonke.
Inkundla yemidlalo le iseduzane lomfula uZambezi, okukhangelelwe ukuthi kukhange abalandeli bomdlalo abazabe bechinsa ukuvakatshela eBinga okwakuqala.
Umgcinisihlalo weMatabeleland North Volleyball Association uSifiso Buhlungu utshele uMthunywa ngoMgqibelo ukuba umncintiswano uzakuba mhlaka 13 kuLwezi.
Uthe ukuqoqa imidlalo eBinga kuzavuselela umdlalo kuphinde kuphakamise indawo yaseBinga.
“Siqoqe imidlalo ye-volleyball edlalwa etshebetshebeni, le-beach soccer eBinga. Lokhu ngokwakuqala kulumdlalo,” kutsho uBuhlungu.
“Sihlose ukusondeza umdlalo ebantwini. Sibeka isicelo sethu kulabo abangasiphathisa ukuze imidlalo iqhube kakuhle.
“Imidlalo le izaguqula iBinga ngoba izaletha izivakatshi, kuvuswe amabhizimusi. Njengoba kuyisiqalo ukwenza lokhu, sikhangelele ukuthi sitshiye sivuse amaqembu omdlalo we-volleyball.”
Isikhulumi seZimbabwe Tourism Authority uGodfrey Koti utshele iphephandaba likazulu ngoLwesibili kuyonale iviki ukuthi bazafuna ukusebenzisa umncintiswano lo ukusakaza ngobuhle besigaba seBinga.
Bambalwa abantu kuleli abazi ukuthi iBinga ilendawo ezinengi abangazivakatshela. Ukuqoqwa komncintiswano kuzaqinisa umkhankaso wokusebenzisa ezemidlalo ukuthengisa ilizwe kuzivakatshi eziphuma kwamanye amazwe.
“Ngaphansi kohlelo lwethu lwe #ZimBho #IZimYami #Vakatsha, sihlose ukukhankasa ngendawo ezinjenge Binga.
Ngokubambana lengatsha zemidlalo etshiyeneyo, silakho ukuthi siphakamise lumkhankaso, silethe inguquko ezigabeni ezingabatshazwa kangako.”
Online Reporter