admin
Thokozile Mbedzi
NGENXA yobukhwele kulendoda yesigabeni seChivake koGutu emangalise abantu ngemva kokutshaya intombi yayo ngembokodo yelitshe endlebeni yafa kubangwa ukuthi isikhombile andubana iyozibophela.
UShepherd Dzivakwe kubikwa ulande intombi yakhe, uRachel Mudondzo oleminyaka engu-32 ngakibo ngehola lika-8 ebusuku mhlaka 28 Mfumfu badlula bethatha umngane wakhe bayabukhelela ebhawa yePast time ngabo 9.
Kubikwa bathi sebephenduka etshwaleni uDzivakwe waqala ukuxabana lentombi yakhe wadobha imbokodo yelitshe wamtshaya ngayo kathathu endlebeni andubana adliwe ngumnyama.
Ekhuluma lentatheli kaMthunywa uEmmanuel Dube uthe ubukhwele yibo obubangele isehlakalo lesi.
“Asazi ukuthi kungani uDzivakwe wakhetha ukuqala ayonatha lentombi yakhe andubana aqale ukuyisola ngokuthi isikhombile.
“Khona nje ukuthi umuntu oyindoda athi esilwa lowesifazana asebenzise isikhali lakho kutshengisa ukuthi kulohlupho. UShepherd wathi ebona ukuthi kabasazwisisani enkulumeni wadobha ilitshe wagongoda ngalo intombi yakhe kathathu endlebeni.
“Esenze njalo wabaleka uRachel wasala esencediswa ngumngane wakhe ukuthi bayofika ngakibo. Ngelanga elilandelayo yikho lapho asiwa khona esibhedlela seGutu wadluliselwa eMasvingo lapho afika wadlulela khona,” kutsho uDube.
Kubikwa uDzivakwe wathi elokhu esadingwa watholakala esefile epulazini lapho ayesebenza khona ehlala lomntanakhe oyintombazana oleminyaka engu-8.
Isikhulumi samapholisa eMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yabo.
“Uzulu kaxwayane lokuxazulula inkinga ngokwenza udlame kodwa kabaqakathekise impilo ngaso sonke isikhathi,” kuphetha uInsp Dewa.
Online Reporter