admin
Nkosilathi Sibanda
KAMBE ingenelisa ukuphinda umphehlo ekaMatshobana? Kulimpelaviki lizasuka lihlale njalo kudibana izitha ezindala kwezenguqu yakuleli; iHighlanders ingqikilana leDynamos kunkezo yokubambana ebizwa ngokuthi yiJoshua Nkomo Legacy Cup.
Lonyaka iDynamos isitshaywe kabili yiBosso. Umbuzo okhona yikuthi iHighlanders ingenelisa na ukudla lithimu kathathu ngesizini eyodwa? Uzahlasimulisa lumdlalo nanko phela iHighlanders isanda kunqoba iDynamos kunkezo yeEasycall kumaviki amabili adluleyo.
IDeMbare yatshona lakunkezo yamasotsha eyeZNA Charity. Khathesi sekumele ziqale phansi futhi, zivuthise inkundla kulinkezo yokubambana. Abaqoqi balinkezo abakhokhelwa nguJabulani Hadebe babika ukuba umdlalo lo uzakuba yisibonelo sokuthi isizwe seZimbabwe sibambene kanye lokukhumbuza izizalwane zakuleli ngemisebenzi emihle kamuyi uJoshua Mqabuko Nkomo. UHadebe, ophinda abengumaqhuzu wenhlanganiso yeJoshua Nkomo Foundation wethule umbiko wokuthi umdlalo weHighlanders leDynamos uzadlala kumahlandla amabili. Owokuqala uzadlalelwa enkundleni yeRufaro esigodlweni. Umdlalo wesibili uzakuba khona mhlaka 22 Mpalakazi eMagumeni eBarbourfields.
“Silungiselela umdlalo lo. IDynamos izaqala ukunxusa iHighlanders eRufaro kulimpelaviki, kuthi ngeviki elizayo, abasekeli bamathimu womabili bahlangane bekholise umdlalo eBarbourfields, ngekhefu lokukhankasela ukubambana.” Okuzadanisa ngalumdlalo yikuswelakala kwabadlali abatshisayo kumathimu womabili. Kuyaziwa ukuthi uKnox Mutizwa, uTeenage Hadebe loNqobizitha Masuku oweBosso kakho ngoba usenkambeni yokulolonga leqembu lamaWarriors.
AmaWarriors alungiselela inkezo yeAfrican Nations Championships (Chan) ezancintiselwa ngoZibandlela ezweni leRwanda.
Abanye kuDynamos abazaswelakala nguRonald Chitiyo, Rodreck Mutuma,Tatenda Mukuruva, Elisha Muroiwa loBlessing Moyo.
Online Reporter