Online Reporter
Ethel Ncube
ZISELE egcekeni izimuli ezedlula i-30, eMtshabezi eGwanda, kulandela ukudilikelwa yimizi ngenxa yezulu eline ngempelaviki yekhefu lePhasika.
Kubikwa kusukela izulu liqale ukuna, kulemizi edlula 30 esidilikile loba kungekho abalimeleyo ngoba benelise ukubaleka besizwa izindlu zidilika.
Intatheli ixhumane losobhuku wakule indawo, uMnumzana Sindiso Nyathi obike ukuba minengi imizi edilikelwe yizindlu.
“Sehlelwe ngumonakalo lapha esigabeni sethu. Izulu litshiye lonile. Abantu basele bengelakudla lezindlu zokuhlala, ngikhuluma kanje, ezinye izimuli zilala egcekeni ngoba zidilikelwe yizindlu zonke.
“Imizi edilikileyo iyedlula 30 loba abanye bengakasazisi njengabakhokheli. Izakhamizi lezi ezidilikelwe yizindlu azilandawo yokuhlala, ukudla lakho konakele emasimini,” kutsho uMnu Nyathi.
UMnu Nyathi ungezelele wathi umonakalo lo kawuphambanisanga emzini yodwa kodwa kubuye kwaphambaniseka lesibhedlela kunye lesikolo.
“Esikolo seMtshabezi High kunye lesibhedlela, ama-solar athethwe ngumoya, mkhulu futhi umonakalo odalwe ngumoya wezulu lo,” kubika uMnu Nyathi.
Induna uMathema ibuye yagcizelela ngendingeko yosizo kumonakalo obekhona.
“Kulomonakalo owenzakeleyo lapha eMtshabezi ngempelaviki, kudilike imizi embalwa abantu basala egcekeni bengela kudla.
“Izakhamizi zidinga usizo lokudla lokuthi zincediswe ukwakha izindlu zazo ezidilikileyo ukuba zithole indawo zokucatshisa amakhanda ngoba zisele egcekeni.
“Sidinga ukuthi izakhiwo ezifana lezibhedlela lezakhiwo ezisetshenziswa ngumphakathi wonke kumele zibe le-insurance.
“Sikhuluma kunje ngabe sikhala okunganeno aluba isikolo lesibhedlela lapho okuthethwe khona ama-solar bekubhadalwa umshuwalensi.
“I-insurance iyancedisa nxa sokuvele umonakalo ofana lalo. Ngesizatho sokuba besingelawo umshuwalensi sidinga usizo ukuthi indawo lezi zilungisiswe masinya ngoba ziphathisa izakhamizi kusigaba sethu,” kubika induna uMathema.
