adminYiNtatheli kaMthunywa
INANI lomvuzo wemali ebangwa kumjaho wePPC Zimbabwe Matopos 33miler seliphezulu, kutsho abasekeli balumncintiswano ozaqhutshwa ngeSonto.
Labo abazazi belesiphiwo enyaweni banxuswe kulumncintiswano weminyaka yonke ozasukela eMatopo usiyacina koBulawayo.
Umjaho lo usekelwa yinkampani yePortland Pretoria Cement Zimbabwe,( PPC Zimbabwe) njalo waziwa yinhlanganiso yeInternational Athletics Federation.
Lonyaka kubikwa sebebanengi abantu ababhalise ukuncintisa kulandela umbiko wokukhwezwa kwemali yomvuzo.
Ngo2015, umvuzo wakuqala wabizwa i$650 kuhlandla lamadoda labesifazane. NgeSonto, isikhulumi somjaho lo uSizwakele Ndlovu uthe umanqoba womango uzaphiwa i$750.
“Sebebanengi abantu ababhalise ukuzoncintisa kuPPC Zimbabwe Matopos 33-miler yomnyaka lo. Siqoqe konke ngokufaneleyo njalo umvuzo walonyaka uphezulu. Singazi kumbe abagijimayo babizwa yimali kumbe abantu sebekhwabitha umjaho lo? Okuhle ngalokhu yikuthi umjaho lo usumemetheka.
“Umjaho lo ugijinyelwa yizizalwane zonke zakuleli. Sonke sikhululekile ukuphatheka kuwo.”
UNdlovu uthe umjaho lo usaqalisa emadabukakusa egedini lephakhi yeMatopo kuqondwe koBulawayo lapho abakhangelele ukuthi ozanqoba umdlalo atshaye intambo ngaphansi kwehola elilodwa.
UCharles Musoza wanqoba umjaho womnyaka odluleyo ngemva kwamahola amathathu le11mins 2sec. UMonica Kativhu ogijimela iHilmax Athletics Clubs watshaya intambo wathola umvuzo wakuqala kuhlandla lamadoda ngokuqeda ngemva kwamahola amane le6min 47sec.
Isikhulumi lesi sithe ngaphandle kokusekela umdlalo wokugijima, inkampani yePPC Zimbabwe izakwakha isikolo kumbe ikilinika emaphandleni eMatopo.
“Sicabange ukuthi sikhulumisane lezakhamizi zeMatopo sibone ukuthi yini engenziwa ukuze sithuthukise lindawo esigijimela kuyo. Mhlawumbe kuzakuba yikilinika kumbe isikolo, kodwa okufunwa yizakhamizi kwaziwa yizo ezihlala kulumango. Inkampani izangena ngokusekela,” kutsho uNdlovu.
Kukhangelelwe ukuthi kuncintise intshantshu ezijwayele ukungasileli kumijaho enjengale. Amathimu enhlanganiso zamapholisa, ogadijele lamasotsha zandise ukubuthanela imincintiswano enjengale.
Online Reporter