adminBuhlebenkosi Gaule
INHLANGANISO yezokulima iAgritex ikhumbuza abalimi ukuthi amalanga okuthakazelela ukulima endaweni ezitshiyeneyo aseseduze njalo kukhangelelwe ukuthi abalimi bahlangane ukuze bacebisane ngendlela zokulima kanye lokufuya ezingabatholisa inzuzo.
UMnumzana Alpha Ndlovu uthe ilanga le-field day liqakathekile kubalimi ngoba kulapho abathapha khona ulwazi ngezilimo njalo bathole lamacebo ikakhulu kulumnyaka lapho izulu eliphuze ukubuya.
Uthe ngenxa yokuthi bakhona abalimi abadobhileyo emasimini kwenza i-field day iqakatheke ukuze kuphathiswe labo abangatholanga lutho.
“Lanxa abalimi abanengi bekhala ngokuphuza kokuna kwezulu bakhona abenelisileyo ukuthola okunye emasimini kungakho abalimi bazafunda okuyikho okuvumayo nxa umumo womkhathi uthe wabanje,” kulandisa uMnu Ndlovu.
Uthe kule imikhosi kuzabe kudibene abalolwazi kwezokulima abazabe bephathisa abalimi ukuze benelise ukubhekana lenhlupho abahlangana lazo kumsebenzi wabo lo,” kutsho uMnu Ndlovu.
Omunye wabalimisi uNkosazana Thubelihle Makhonjwa weMzingwane uthe amalanga anjengala ayabanceda njengabalimisi ngoba bathola ulwazi olunengi njalo bathola ithuba lokubukisa imsebenzi yabo kwabanye abalimi.
UNkszn Makhonjwa ubuye wathi ilanga lokulima lipha abalimi ithuba lokukhetha inhlanyelo evuma indawo ngendawo ngemva kokukhangelisisa ngesivuno esitholwe ngabanye babo.
“Ngamalanga okuthakazelela ukulima kulapha esibona khona umhlobo wenhlanyelo oyabe uvumile lalo ongenzanga kuhle emasimini ngoba eminye imihlobo iyahlupha kwezinye indawo,” kutsho uMakhonjwa.
UMnu uNdlovu uphethe ngokuthi abantu bazakwaziswa ngokuya kwesikhathi ngamanye amalanga ama-field day esigabeni seMatabeleland kodwa amanye amalanga asekhona.
“AbeNkayi bazathakazelela ilanga lokulima mhlaka 1 Mabasa ePannar kuthi abeHwange kuwadi 15 ePearl Millet Plant-Population.
“Abakuwadi 11 eBubi bazahlangana mhlaka 7 Mabasa ePollards Irrigation Scheme,” kutsho uMnu Ndlovu.
Umnuzana Ndlovu ukhuthazile ukuba abalimi bebekhona lapho okuyabe kulomncimbi wokuthakazelela ukulima ngoba konke lokhu kwenzelwa abalimi.
Online Reporter