Kudingwa isikolo esitsha eHwange

Nkosilathi Sibanda

UKUVULEKA kwamathuba emisebenzi lamabhizimusi edolobheni leHwange sekwengeze lenani labantu abahlala kulindawo.

Ukwanda kwabantu lokhu sekudale ukuthi kube lokusilela kwezikolo ezikhona, okuyikho osekufuqe ikhansili ukuba ibumbe icebo lokwakha esinye isikolo.

Iphephandaba likazulu lizwe ukuba iHwange Local Board ikhathazekile ngokusilela kwamakilasi esikolo sayo eseNechibondo Primary.

Kubikwa sekulabafundi abanengi kulesi isikolo, osekwenza kubelezifundo eziqhutshwa emini. 

Isikolo seNechibondo Primary kubikwa silabantwana abedlula i-1 700.

Ngokunjalo, kumbiko owethulwe ngunobhala weHwange Local Board, uNdumiso Mdlalose, sekumele kwakhiwe isikolo esitsha.

Uthe isikolo lesi bakhangelele ukuthi sakhiwe eDynamic Village njalo ibhajethi yekhansili lumsebenzi iwubeke ku-US$500 000. 

“Njengoba abantu besiza lapha ukuzothola imisebenzi, inengi lezisebenzi lezi zibuya lemuli zazo. 

“Sekube lokwanda kwabafundi ezikolo, ikakhulu eNechibondo Primary School,” kutsho uMdlalose.

Ekwakhiweni kwesikolo esitsha esihlelwe yiHwange Local Board kubikwa kuzasebenza imali ephuma esikhwameni sekhansili kunye lakuDevolution Fund.

Kusenjalo, kuzwakale ukuba kuzakhiwa lezinye izikolo ezintathu ezindlini zeDRC Empumalanga laseMpumalanga Phase 4, ngokuya kwesikhathi sekutholakale imali.