Siphakeme .Mnindwa
Bhekimpilo Tshalibe
NGENHLOSO yokuphakamisa abantwana abangamantombazana, lokulondoloza amasiko, inhlanganiso yeMiss Teen of The Universe Zimbabwe (MTOUZ) izaqoqa umncintiswano wokutayila, kudingwa lo ozakwedlula abanye, etheswe umqhele.
Umqondisi walinhlanganiso koBulawayo uZanele Moyo uthe bazaqhuba uhlelo lokuhlola amankazana afuna ukuzotayila kulumncintiswano mhlaka 15 Nhlolanja.
“Sizaqhuba ama-auditions okudinga uMiss Teen of The Universe endaweni ezehlukeneyo. KoBulawayo kuzabe kumhlaka 15 kuyonale inyanga. Sizakuya eBeitbridge, Kwekwe sicine eHarare mhlaka 2 Mbimbitho. Sikhangelele ukuthi umncintiswano wokucina ube mhlaka 26 Ntulikazi koBulawayo,” kutsho uMoyo.
Uthe baqhuba umncintiswano lo belandela indikimba ethi: “Ukuphakamisa amantombazana ngokulolondolza amasiko lamagugu kukhangelwe iVision-2030”.
UMoyo uveze ukuthi kulabo abafuna ukuncintisa, kumele bakwazi ukuthi bahloseni lokuthi ngempela bayazi ukutayila hatshi abazofundela.
Uthe ebantwini abazaphatheka bafuna umuntu okwaziyo ukuthi ufunani empilweni.“Ekuhloleni kwethu, kasidingi loba ngubani, sidinga lo okwazi ukuthi ufunani njalo ufuna ukwenzani. Njengoba lisazi ukuthi eZimbabwe silethalenta elinengi, sidinga umuntu ohlukileyo okwaziyo ukuthi umntwana oyinkazana kumele ephakanyiswe,” kutsho uMoyo.
UMthokozisi Masuku ongumqondisi omkhulu we(MTOUZ) uthe kulaba abafuna ukuphatheka kumele babhadale US$15.
“Kulabo abafisa ukuphatheka kumele babhadale iUS$15 njalo imali le izancedisa nxa sebehamba endaweni ezitshiyeneyo lekuthengeni ukudla.”
Online Reporter