Siphakeme .Mnindwa
Bhekimpilo Tshalibe
UKUFUYA imvundla ngenye yamabhizimusi okufuya ahamba phambili kuleli.
Lokhu kuvezwe nguMnumzana Edmore Chikowa onguLivestock Officer koBulawayo, kunhlanganiso yeAgritex.
UMnu Chikowa uthe ukufuya imvundla kulenzuzo enhle njalo abalimi bakhululekile ukuthi bafuye imihlobo etshiyeneyo egoqela inyanga type, Flemish giant, New Zealand, California white kanye le-chinchilla gigantica.
“Imvundla ilemihlobo etshiyeneyo egoqela i-Nyanga type yona elombala ongathi ligolide futhi iba lesisindo se-5.5kg. Kukanti umhlobo we-flemish giant ulombala omnyama kumbe ongathi ulithanga. Lowu ke umhlobo wemvundla udla kakhulu kodwa ubuye ube lenyama enengi nanko ubalesisindo se-5,9kg.
“Umhlobo weNew Zealand ngumhlobo okhula ubenje phakathi laphakathi. Eminye yakhona ibamhlophe kumbe ube bomvu.
“I-chinchilla giant ibonakala ngombala omnyama lenyawo ezinkulu eziqinileyo njalo ulesisindo se-7,3kg,” kutsho uMnu Chikowa.
Uqhubekele phambili wathi imvundla kayifuni langa njalo ukhuthaza abalimi ukuthi bayakhele izilugu ezilophahla.
“Sikhuthaza abalimi ukuthi bakhele imvundla izilugu ezilophahla njalo ezibetha umoyo. Akumelanga kungene amanzi nxa izulu lisina. Kumele zihlale zikhudumala ngoba abantwana bemvundla bengangenwa ngumqando bayafa,” kutsho uMnu Chikowa.
Uthe ukhuthaza abalimi ukuthi bengaminyanisi imvundla.
“Sikhuthaza abalimi ukuthi bengahlalisi imvundla eminengi esibayeni sinye ngoba ingatshiselwa kakhulu iyafa njalo sikhuthaza abalimi ukuthi bakhe indawo yokufuyela imvundla ngamapulanka ukwenzela ukuthi kungatshisi,” kuphetha uMnu Chikowa.
Online Reporter