adminBuhlebenkosi Gaule
KULENDODA ye-Ultra High eGwanda ehlahlele umkayo kanye lendodakazi yayo eleminyaka emihlanu qede yadla utshani ngenxa yobukhwele.
UBrian Magogo ugamule umkakhe uAgnes Ndlovu lendodakazi yakhe elizalizelwe.
Kubikwa umetheswacala ube lobukhwele bokuba kungani uNdlovu ebesiyacela imali yesondlo kuyise wendodakazi yakhe, okutholakale ukuthi nguInnocent nje kuphela.
Kubikwa uMagogo ngeSonto mhlaka 15 Nkwenkwezi wezwa ukuba umkakhe wahamba wayacela imali yesondlo kuyise womntwana okwenza wathukuthela kakhulu.
Kubikwa uMagogo wafica umkakhe labantwana belele ngehola letshumi ebusuku kazange athande ukuphozisa amaseko kodwa wahle wabahlahlela ngehloka esithi umntwana lo usefuna ukwenza uNdlovu abuyelelane loyise.
UNdlovu owayeseganyulwe ikhanda wenelisa ukuphunyuka waya emzini womnewabo uTawanda Zhou ohlala bucwadlana labo.
UZhou uthe ebona umnawakhe ebuya egijima esopha kubikwa wazama ukumbuzisisa ukuba kutheni andubana babhekise amabombo ngakwakhe bathola uMagogo esebalekile kodwa etshiye egamule indodakazi kaNdlovu loInnocent ekhanda isebuthongweni.
UMagogo akabonakalanga ukuba waqonda ngaphi ngemva kokwenza lokhu.
Kubikwa umntwana usesimeni esibi esibhedlela seGwanda General kukanti uNdlovu walimala kakhulu ekhanda.
Intatheli yephephandaba ixhumane lomele isikhulumi samapholisa eGwanda uAssistant Inspector Nkosilathi Sibanda ovumileyo ukuthi sebewamukele umbiko lo.
“Umbiko wokuganyulwa kowesifazana lendodakazi yakhe sesiwamukele lanxa umetheswacala engakabotshwa.
“Sithanda ukucebisa uzulu ukuba ancedisane lamapholisa ngoba umuntu lo uyingozi emphakathini kungakho abangabe belolwazi lokuba uMagogo ucatshe ngaphi sicela bazise amapholisa aseduzane labo.
Sicebisa uzulu ukuthi nxa kulokungezwani ezimulini bazame ukukhulumisana kumbe babuye enkambeni yamapholisa babone ababona ngobudlelwano emphakathini ukuze bancedise kukhunyiswane umlotha,” kuphetha uAsst Inspector Sibanda.
Online Reporter