adminYiNtatheli kaMthunywa
INHLANGANISO ephethe inhlelo zomdlalo we-basketball kuleli ibika ukuthi izasungula iligi yezikolo ngenhloso yokuvuselela umdlalo lo kanye lokudinga abadlali abasakhulayo.
Lokhu kuza ngemva kombiko wokuthi izikolo zesabelo seMatabeleland North zikhuthazwe ukuthi zisekele imincintiswano eqoqwa yinhlanganiso le kulindawo.
Umgcinisihlalo weBasketball Union of Zimbabwe (BUZ) esabelweni seMatabeleland North uPendrick Ndlovu ubike ukuba bazimisele ukuthuthukisa umdlalo lo kuzozonke izigaba zeMatabeleland ngoba ukumemetheka kwawo kulesisabelo kungumlandu wabo.
“Kade saqalisa ukukhuluma ngokuthi kumele umdlalo wethu ufike emaphandleni, ikakhulu emadolobheni anjengeHwange laseFolosi. Ukudlalwa kwe-basketball kundawo ezingaphandle kwedolobho lakoBulawayo kuzanceda.
“Inhlanganiso yeBUZ nxa ingathola usekelo kumathimu ezikolo, izazama ukudinga amabhola lamambule kanye lokucentwa kwehlathi lapho okuzakhiwa khona inkundla,” kutsho uNdlovu.
Uqhubeke wathi udubo abakhangelane lalo ngolokusilela kwababalisi abalezithupha ezipheleleyo zokufundisa ukudlalwa kwe-basketball.
“Umdlalo we-basketball ukhona ezikolo kodwa udubo yikuthi akulankundla njalo lababalisi abalolwazi ngalumdlalo kabakho.”
UNdlovu uthe okwamanje baphezulu kokuxoxisana labaphathi bezikolo ukuthi bavumele ababalisi bangene kuzifundo zokuqeqetsha imidlalo etshiyeneyo.
“Insika yokuphumelela komdlalo we-basketball leminye imidlalo yikuqala ukufundisa abantwana abasesikolo. Nxa umbalisi engazi lutho ngomdlalo, kubanzima ukuthi sakhe ithalenta lisahluma.”
Umgcinisihlalo lo utshele uMthunywa ukuthi kungenzeka ukuthi kube leligi yezikolo elakho ukuqalisa ekupheleni kukaNhlangula.
“Abaphathi bezikolo esikhulume lazo eLupane, eHwange, eNkayi laseFolosi bayavumelana ukuthi kube leligi ye-basketball lapho izikolo ezizancintisana zodwa.
“Mhlawumbe kusiyaphela inyanga le kungabe sekudlalwa isabelo sonke,” nguNdlovu lo.
UNdlovu uthe bahlose ukuthola usizo lokucenta kanye lokwakha inkundla ezizasetshenziswa ngabadlali kanye labathandi balumdlalo.
“Okuhlabusayo yikuthi intsha yakulindawo isizakhwabitha ukudlala lokubukela umdlalo lokuchitha isizungu ngalumdlalo ongajwayelekanga emangweni weHwange laseFolosi.”
Online Reporter