Online Reporter
Ethel Ncube
IZAKHAMIZI zeGuyu, eGwanda zihlalele evalweni ngemva kokudlwengulwa kwabantwana besikolo ababili egangeni ngenye indoda engumzawabo, yabaleka.
Indaba le yenzakale ngoMabasa.
Kubikwa umetheswacala (igama siligodlile) ngenhloso yokungaphambanisi ukuchwayisisa kwamapholisa, ubecathamela abantwana laba bevela esikolo abadlwengule egangeni.
Isakhamuzi esikhulume lephephandaba sibike ukuba njengezakhamizi badinga ukuncediswa ukuze umetheswacala abotshwe.
“Umfana lo wadlwengula abantwana besikolo abane njalo kulabomama abadlwengulayo kodwa bayafihla. Umsolwa wabaleka, uzwakalela endaweni eziseFilabusi.
“Kunje izikolo seziyavulwa, abantwana bayesaba ukuba bazahamba njani ngoba isigangi lesi asikabanjwa,” kutsho isakhamuzi lesi.
Siqhubekele phambili sathi sicela abangabe besazi ukuthi umsolwa ungaphi babikele amapholisa aseduzane labo.
“Sixwayisa abantu ukuthi nxa kungafika abafana bedinga imisebenzi baqale bayelabo kubosobhuku kumbe emapholiseni, bangabafihli ngoba yizo izigangi ezicina zisihlukuluzela abantwabethu.
“Umetheswacala lo sinakanela ukuthi uyasebenza khonapha emakhaya kungakho izakhamizi kungafika umuntu edinga umsebenzi kazicele isithupha njalo zimuse kunkokheli zesigaba.
“Asincedisaneni zakhamizi isigebenga lesi sibanjwe ukuze abantwabethu baphephe. Omama sibakhuthaza ukuthi nxa besiya egangeni ukuyatheza inkuni bahambe bebanengi ukuze bancedisane nxa behlaselwa,” kubika isakhamuzi lesi.
Intatheli ixhumane lesikhulumi samapholisa elizweni uCommissioner Paul Nyathi ovumileyo ukuthi amapholisa achwayisisa indaba enjalo.
“Sichwayisisa ngodaba lwendoda eyadlwengula abantwana bomzawakhe ababili. Umetheswacala kakabotshwa, uyadingwa ngamapholisa.
“Sicela ongabe elodletshana lokuthi umetheswacala lo singamthola ngaphi athinte amapholisa aseduzane laye,” kuphetha uCommissioner Nyathi.
