Online Reporter
YiNtatheli kaMthunywa
IZIZALWANE zakuleli zizathakazelela amasiko azo atshiyeneyo kulinyanga kaNkwenkwezi njalo kubikwa amalungiselelo akubanga eliphezulu ezabelweni zonke.
Ukuthakazelelwa kwamasiko lokhu kuvela ngemva kokuphawulwa yinhlanganiso ye-United Nations Educational, Scientific and Cultural Organisation (Unesco), eyathi kubekwe umhlaka 21 Nkwenkwenzi, iWorld Day of Cultural Diversity for Dialogue and Development.
Indikimba yalonyaka ithi: “Ukuthakazelela amazwi omdabu”.
Esabelweni seMatabeleland South, ilanga lamasiko lizananzwa mhlaka 30 Nkwenkwezi, esigabeni seBulilima.
KoBulawayo abantu bazahlangana kundawo ezitshiyeneyo bejabulela isiNtu sabo, kuthi eMatabeleland North abantu bazakuthi gwaqa eTsholotsho.
Ukuthakazelelwa kwalelilanga kuvulwe ngokusemthethweni nguMphathintambo wezemidlalo kuHulumende uLieutenant-General (Retired) Anselem Sanyatwe, ekuqaleni kwalinyanga.
UMphathintambo uSanyatwe uthe izizalwane zakuleli kumele zizigqaje ngamasiko azo.
“Kuyintokozo enkulu ukuthi ngimemezele ngokusemthethweni ngeCulture Month, okuyikuthakazelela amasiko lamagugu ethu njengesizwe. Amasiko angumphefumulo wobuntu bethu.
“Yintambo ehlanganisa isikhathi esedluleyo, khathesi lekusasa.
“Kulinyanga sithakazelela osaziwayo kwezomculo, abalobi, abagidayo lalabo abalondoloza amasiko ngenhloso yokuthi engafadalali.
“Sifuna ukukhuthaza ukucabanga kakutsha ngokuthi singobani njengezizalwane ze-Africa,” kutsho uMphathintambo uSanyatwe.
Inkuthazo enkulu ivele kuMongameli welizwe uEmmerson Mnangagwa, okhankasele ukuthi kumele kugqokwe iNational Dress, kube yisitshengiselo sokuthakazelela amasiko akuleli.
UMongameli uMnangagwa uzavula ngokusemthethweni ukunanzwa kwamasiko, esabelweni seMasvingo.
UMphathintambo wogatsha lwe-Information, Publicity and Broadcasting Services kuHulumende, uDokotela Jenfan Muswere wabika ukuba uMongameli uMnangagwa uzavula ngokusemthethweni emzini wenduna uTshovani, esabelweni seMasvingo.
