admin
Thokozile Mbedzi
KULEMULI yesiqintini seMusane eBeitbridge edinga usizo lokugcina izelamani ezine kulandela ukufelwa nguyise kunyanga ezine ezedluleyo osekubangele ukuthi zehluleke ukuya esikolo.
Izelamani zakoNdou, ezingabafana ezihlala eMapili ezithi uMoses (14), Endby (10), Jepherese (7) lo Rotenda (4) ziphila ngokucela nanko phela zihlala logogo osekhulile ongasenelisi lokusebenza kulandela ukufelwa nguyise.
Usobhuku omkhulu wesigabeni seMapili uSteven Lamola uthe bakhathazekile ngemuli yakoNdou njengoba abantwana kabasafundi sebetshona behlezi ngekhaya.
“Sicela uzulu asiphathise ngabantwana abahlala ngaphansi kwesigaba sami asebehlezi phansi ngoba imali yokuthi basiwe esikolo kayikho.
“Abantwana laba lokuya ethunjini bakuthola nzima ngoba ugogo onguye obakhangeleyo usemdala. Unina wabantwana laba wehlukana loyise engakabhubhi wabuyela kibo wabatshiya.
“Kayisikho ukuthi abantwana laba bebevele behlezi kuhle, kodwa langesikhathi uyise esaphila kwakuvele kulobunzima. Khathesi udubo lwakhona soluphindwe kabili ngoba sebesele egcekeni logogo wabo,” kuchasisa uSobhuku uLamola.
Uqhubekele phambili esithi abantwana laba badinga ukudla, impahla zokugqoka kanye lemali yokuthi baye esikolo.
“Ngokuzehlisa okukhulu ngithanda ukucela uzulu ongabe esenelisa ukuthi asiphathise ngokudla, impahla kanye lemali yesikolo ukuze abantwana laba benelise ukuya esikolo njengabanye abantwana,” kutsho uSobhuku uLamola.
UMlisa wakulindawo uMnumzana Liberty Muleya laye ugcizelele wathi abantwana laba kakho ongabaselela ngoba ugogo usemdala.
“Umntwana ngowomuntu wonke ngakho ngicela ukuba abantu basisize sendlalele ikusasa labantwana laba. Mhlawumbe bangathola ithuba lokuya esikolo bangakhula labo bazakwenelisa ukuncedisa abanye emphakathini,” kuphetha uMlisa uMuleya.
Online Reporter