admin
VARIMI venzimbe avo vange vakatarisana nedambudziko munyaya dzemadiridziro vobatsirika zvakanyanya kuburikidza nekushandisa michina yeMoneyMaker Irrigation Pumps.VaBrian Vere vanove mukuru wekambani yeBlagefields Marketing (Pvt) inogadzira michina iyi kuBelvedere, muguta reHarare vanoti madiriziro eMoneyMaker Irrigation Pumps akakoshera varimi venzimbe avo vanowanzonetseka pakudiridzira minda yakakura.
“NeMoneyMaker Irrigation Pumps varimi vanowana zororo nekuti zvinongoda vanhu vaviri bedzi vanoti mumwe anenge achitsika-tsika kuchitsoka-tsoka kunobva nemvura mumwe akabata pombi achidiridza kwechinambwe chemamita 45 kana kudarika.
“Madiridziro aya anoita kuti makambani makuru akadai sanaTriangle Sugar Limited, Hippo Valley neMkwasine Estates asadhurirwe nekupinza vashandi vakawanda basa, zvikuru panguva ino yekunetsa kwemari.
“Makambani iwayo haadhurirwe zvakare nekuti madiridziro emhando iyi haadi simba remagetsi, dhiziri kana peturu,” vanodaro VaVere.
Vanoti kuburikidza nemadiridziro eMoneyMaker Irrigation Pumps, vashandi nevashandirwi vanorerukirwa nebasa.
“Nzimbe dzinodiridzirwa nemadiridziro eMoneyMaker dzinokura zvakanaka dzichiita muto wakawanda apo dzinosvinwa kumichina inogadzira shuga kureva kuti shuga yakawanda inogadzirwa nenzimbe shomanana zvichiita kuti makambani afambirane nechirongwa cheHurumende cheZim-Asset icho chine donzvo rekusimudzira mahindasitiri emuno,” vanodaro.
Online Reporter