Kudubuka ibhomu emzini kaMaNyathi eLupane

Yintatheli kaMthunywa

BATHITHIBELE abahlali beMqoqi eLupane, kulandela ukudubuka kwenkalakatha yebhomu phakathi komunye umuzi. Umuzi lo ngokaNkosikazi Hildegard Nyathi Mufukare, usaziwayo kwezengqubekela phambili ongumqondisi wenhlanganiso yeLupane Women Development Trust (LWDT).

Kusehlakalo lesi esisaphethwe emlonyeni kulindawo, kubikwa ibhomu leli lidubuke ngeSonto emini latshiya libhidlize indlu, umdumo walo uzwakale lasenzikini yamabhizimusi eLupane.

Ebika ngalokhu, uNkosikazi Mufukare utshele iphephandaba likazulu ukuba bathithibele kodwa babonga uNkulunkulu ngokuthi akulamuntu olimeleyo.

“Sitshaywe luvalo sisizwa ngakho. Sibonga kuphela ukuthi impilo zabantu zisindile kulokhu.” UNkkz Mufukare wazise ugatsha lwe-Civil Protection Unit (CPU), obeluphenya udaba lolu ukuba bekulabantu abahlanu egumeni.

Uthe ngaleso isikhathi abantwabakhe bebesanda kutshisa izibi egodini, abalisebenzisa ukuchitha izibi.