admin
ABATHANDA ukungena ebhawa ebusuku batshaya imbululu nanko phela uHulumende usethe awavulwe, kodwa kulabo abahlatshwe ijekiseni yokuvikela iCovid-19.
Kube zindaba ezimnandi lakuzisebenzi labosomabhimuzi kundawo zokuzithokozisa lezi, ukuzwa lokhu.
Umbiko wokuvunyelwa kwamabhawa lo uvele kuMphathintambo wezokukhitshwa kwembiko kuHulumende uMonica Mutsvangwa kulandela umhlangano wamalunga eKhabinethi ngoLwesibili.
“Ikhabinethi isivumele ukuthi amabhawa alechence avulele labo abahlatshiweyo kuphela,” kutsho uMphathintambo uMutsvangwa.
Amabhawa kuzamele alandele izinqumo zokuvikela ukumemetheka komkhuhlane weCovid-19.
“Abanikazi bamabhawa kumele bakubone ukuthi kulayandelwa izinqumo zeWorld Health Organisation lalezo ezelizweni. Kungehlula lokhu, kuyesulwa ichence. Amabhawa kumele alandele amahola e-curfew,” kutsho uMphathintambo uMutsvangwa Besekudonse umnyaka owodwa lenyanga eziyisikhombosa amabhawa avula ebusuku la engavulwa.
Online Reporter