admin
Thokozile Mbedzi
NGENXA yokudliwa kulenjiva eyenze into yamehlo nanko phela ithe ngemva kokwaliwa ngumakhwapheni wayo yamlandela kibo esiqintini seMapili eBeitbridge yafika yathela iphethulo endlini yayilumathisa okubangele ukuthi kufe esinye isihlobo ebesizolamula.
UEmmanuel Ndou oleminyaka engu-42 kubikwa wenze imbedumehlwana le, emzini kaSibongile Mutaurira Mudawu oleminyaka engu-49 abethandana laye esigabeni seMsane ngelanga leKhisimusi kumnyaka osanda kwedlula.
UMthunywa uzwe ukuthi lanxa uMudawu wenelisa ukuphuma kodwa esinye isihlobo, uMnumzana Muyadziwa Mushe (70) esafika sizolamula ababili laba sehluleka ukweqa ngefasitela nanko phela umnyango wawusuvaliwe okuyikho okwabangela ukuthi sitshe.
Kubikwa ngesikhathi uNdou ethela iphethulo endlini le kwakuvele kulayithwe isitofu segasi njalo kulegabha le-doom lokufafaza phakathi.
Ekhuluma lentatheli kaMthunywa uMnumzana Alfred Moyo onguSobhuku omkhulu uthe lokhe edidekile ngesenzo senjiva le.
“USibongile nguye owaqala ukufika emzini wakhe njalo kukhanya kwakuvele kulempi phakathi kwakhe lomasihlalisane wakhe khonale eGoli. Wasuka bexabana yikho nje waze wamlandela.
“Ekufikeni kwakhe kwahle kwaba yisiphansi phezulu sokulwiwa endlini. Ngalesosikhathi uNdou wayethetha ethi udliwe kakhulu nguSibongile waphinda wasuka embalekela eGoli.
“Wathi elokhu ekhuluma wathela i-5 litres yephethulo ngenxa yokuthi umsindo wawumkhulu abantu ababephandle bacela uMnu Mushe owayemdala njalo eyisihlobo sikaSibongile ukuthi ayebhula umlilo,” kulandisa uSobhuku uMoyo.
“Ekufikeni kwakhe endlini wafica ababili laba besilwa wathi ebaxazulula uNdou wahle wadumela yena wathi kabalwe njengamadoda.
“Ngaleso sikhathi isivalo sahle savaleka njalo uNdou wayevele eselumathise umentshisi kwahle kwaqala ukulumatha.
“USibongile weqa kuqala ngefasitela, uNdou laye ebona ilangabi selisiza ngamandla laye waphuma ngefasitela .UMnu Mushe wasala esehluleka ukuvula isivalo waze wavulelwa nguSibongile ngaphandle kodwa wayevele esetshile,” kuchasisa uSobhuku uMoyo. UMnu Mushe wagijinyiselwa esibhedlela seBeitbridge kodwa wahle wabhubha mhlalokho. Abantu ababelapho bahle bambamba uNdou bamusa emapholiseni.
UMlisa wakulindawo uLiberty Mleya ebuzwa ngodaba lolu uthe lwenzakele sibili esigabeni sakhe njalo abantu kabazame ngawo wonke amandla ukudinga abaxazululi nxa kulokungazwani.
“Abantu kababe lobuntu lapho abahlangana khona, aluba uEmmanuel waba lobuntu aluba kakuzange kube lomuntu ofayo. Ngabe udinge abadala besigaba kwakhulunywa ngesihle hatshi ukubhidliza okunje.
“Abantu kabadinge usizo kubaphathi babeluleke ngesizotha hatshi ubudlwangudlwangu. Ngithanda ukubonga bonke ababamba isikliwi lesi ukuba sijeziswe ngumthetho,” kuphetha uMnu Mleya.
Online Reporter