admin
KAZIYIVALI imilomo izakhamizi zesigabeni esingaphansi kwenduna uChireya eGokwe kulandela ukugula umkhuhlane wengqondo kwemuli yonke yakoMagucha uMthunywa uyakuveza lokhu lamhlanje.
Imuli kamuyi uLivison Mugucha owabhubha ngomnyaka ka-2012 kubikwa isigula umkhuhlane wengqondo ngenxa yokwehluleka ukulalela isixwayiso sikamufi.
UMthunywa uzwe ukuthi ngesikhathi uMugucha esedlula emhlabeni walaya umkakhe, uSiphiwe Mugucha kanye labantwabakhe abangamantombazana ukuthi babophe impahla zakhe indodana yakhe ize ibuye izozithatha kodwa kabazange bakulandele lokhu.
Ekhuluma lentatheli uMnumzana Zvisineyi Moyo uthe bathwele nzima ngemuli kaMugucha yona esigula umkhuhlane wengqondo konke labakhwenyana.
“Imuli yonke yakoMagucha kunye labakhwenyana kabasaphilanga kuhle engqondweni ngenxa yokwehluleka nje ukulandela isixwayiso ababesitshiyelwe.
“Ubaba uLivison watshiya elayele ukuba angafa unkosikazi wakhe labantwana bengalingi bachithe impahla zakhe umntanakhe ongumfana nguye okumele azichithe. Kukhanya unkosikazi wakhe wakutshaya indiva lokhu, bachitha impahla baze banika labakhwenyana abane. Ngenxa yesenzo lesi bonke abakhwenyana, abantwabakhe abangamantombazana kunye laye umama bonke sebegula.
“Nxa abanye abemuli besiya kubosiyazi batshelwa ukuthi impahla lezi abazichithayo kumele bazibophe futhi,” kuchasisa uMnu Moyo.
Uqhubekele phambili esithi uNkkz Magucha useze ehlala komunye usiyazi ngoba ekhaya akusahlaleki njalo indaba le isize yabikelwa induna.
“Induna layo isithe kungcono impahla lezo zibiselwe kube sokulandelwa izifiso zikamufi.
Induna yakulindawo uChiya Chireya ibuzwa ngodaba lolu ivumile yathi basayixazulula labaphathi besigaba indaba le.
“Udaba lwemuli esigula umkhuhlane wengqondo ngemva kokwabelana impahla zomufi solufikile edale lami njalo sisaluxazulula labaphathi bezigaba ukuze imphahla zomufi zibuyiselwe.
“Sikhangelele ukuthi impahla zingabuyiselwa sokuzaqhutshwa umsebenzi ngokwesiko ngoba ofileyo vele kalaxolo nxa sejezisa kakhethi.
“Kumele zonke impahla zibuyele umfana lo adingwe kuqalwe kutsha ukuchitha impahla lezo ngoba njengabaphathi indaba ezinje kumele silandelwe ngendlela elesizotha,” kuphetha induna uChireya.
Online Reporter