admin
UMAMA wesizwe uNkosikazi Auxillia Mnangagwa usekhuthaze omama belizweni kanye labanye abasemazweni ukuthi bahlanganyele laye kunsuku azibekileyo zomkhuleko kanye lokuzila ukudla kucelwa kuSomandla ukuba ilizwe lisindiswe kunhlekelele kanye lasekuhluphekeni okulethwe ngumkhuhlane weCovid-19.
Insuku eziqanjwe ngumama wesizwe kumhlaka 21 kusiya kumhlaka 23 Zibandlela 2021.
Umama wesizwe uthe ilizwe lihlulukelwe ngenxa yokufa kwabantu abanengi okubekhona kumaviki amabili edluleyo.
“Igcikwane leli lilethe usizi ezigabeni zethu kumaviki amabili edluleyo. Akulamuli engalahlekelwanga yisihlobo ngenxa yobhubhane lolu kungakho-ke ngithanda ukukhuthaza omama bonke ukuthi bahlanganyele lami kunsuku ezintathu kusukela kusasa (oLwesine) lapho esizazila ukudla siphinde sikhuleke kuNkulunkulu sicela asindise usapho lweZimbabwe.
“Njengabomama sidlala indima emqoka emphakathini. Ngikhuthaza wonke umuntu ongumama ukuthi akhuleke kuMdali sicela asihawukele njalo elule isandla sakhe somusa ngalesi isikhathi esinzima.
“Asidlaleni indima yethu ngokubona ukuthi umuntu wonke osemizini yethu uyalalela imilayo eyabekwa nguHulumende ukuze kwenqatshelwe lumkhuhlane,” utsho njalo. Uthe kumele umuzi munye ngamunye ubelohlelo lokuhlanza ikhaya, ukubona ukuthi wonke umuntu ekhaya uyazi ukuqakatheka kwezaheke lokuzigqoka ngendlela efaneleyo lokuhlela ngendlela elokuhlakanipha njalo ephephileyo indlela zokuthola okufunakalayo ezindlini.
“Kumqoka ukuthi sibone ukuthi amakhaya ethu ahlala eyizindawo eziphephileyo ngaso sonke isikhathi njalo siphinde sazi ukufundisana ngobubi bobandlululo nxa kuthe kwaba losebanjwe elomkhuhlane lo.
“Kumele sazi ukufundisa amalunga onke omdeni ngendlela zokuphathisa labo abalalumkhuhlane lokuzigcina bona bephephile ngasikhathi sinye.
“Lapho sikhulekela usindiso elizweni, kumele silandele imilayo yonke. Okungcono yikuzila ukudla kanye lokukhuleka sisemakhaya ethu. Kulabo abazakhetha ukuhlangana bengamaqula abantu abalutshwane njengalokhu okutshiwo yimilayo yeCovid-19, kumele bagqoke izaheke ngaso sonke isikhathi kanye lokutshiya umkhandlu ofaneleyo phakathi kwabo.”
Umama uMnangagwa ukhuthaze ubukhosi bomdabu obugoqela izinduna, abalisa, kanye labosobhuku ukuthi busabalalise ilizwi ngalezinsuku zokukhuleka ukuze omama bonke belizweni bathole ukuphatheka kuwo.
Uphethe ngokubonga izisebenzi zogatsha lwezempilakahle ethi zingamaqhawe elizwe ngomsebenzi eziwenzayo ekuphathiseni abagulayo.
Online Reporter