admin
YiNtatheli kaMthunywa
KUFE abanye abantu abangu-60 ngoMvulo kuphela bebulawa yisifo seCovid-19 lokhu okuhle kwakhweza inani labantu asebebulewe ngumkhuhlane lo laya ku-773.
Abantu abafe ngoMvulo kuphela yibo abanengi abafe ngosuku lunye kusukela ngesikhathi kuqala ukubonakala iCovid-19 kweleZimbabwe ngenyanga kaMbimbitho nyakenye.
Ngosuku olufanayo kulabantu abangu-689 abatholakale belomkhuhlane weCovid-19 umkhuhlane obangelwa ligcikwane le-coronavirus okukhuphule inani labantu asebetholakale belomkhuhlane lo laya ku-27 892.
Kusitatimende esikhitshwa nsukuzonke lugatsha olubona ngezempilakahle lokondliwa kuhle kwabantwana kubikwa ukuthi, “Phakathi kwabantu abangu-27 892 abatholakale beleCovid-19 elizweni lonke, abangu-17 372 sebasila kukanti abangu-773 sebedlula emhlabeni. Isabelo seHarare yiso esilabantu abanengi asebedlule emhlabeni abangu-279 kulandela isabelo sakoBulawayo lapho osokufe abantu abangu-151 bebulawa ngumkhuhlane lo.”
Ugatsha lolu luthi ngoMvulo, esabelweni seManicaland kufe abantu abalitshumi okubangele ukuthi inani labantu asebefile esabelweni lesi liye ku 116. EMidlands sokufe abangu-5, eMasvingo abathathu, Mashonaland Central kanye leMatabeleland kufe ababili kusabelo ngasinye.
Isabelo esilabantu abalutshwana asebedlule ngenxa yomkhuhlane lo ngeseMatabeleland North, lanxa esabelweni lesi kuyilapho okwaqala khona ukutholakala umuntu oleCovid-19 eZimbabwe ngenyanga kaMbimbitho nyakenye.
UHulumende wenza imizamo eqinileyo yokulwisa ukumemetheka kwegcikwane le-coronavirus elizweni kugoqela ukuthi uzulu ahlale ezindlini kusukela ngeviki yokuqala yenyanga kaZibandlela. Abenza imisebenzi eqakathekileyo yibo kuphela abavunyelwa ukuyasebenza.
Online Reporter