adminEthel Ncube
AZILAMATHE izakhamizi zeNdlalambi, eZhombe kulandela ukufa komntwana onathe amahewu akade eletshefu emzini wesinye isakhamuzi ebesinxuse abantu elimeni.
Kubikwa ukuthi kulezakhamizi ezingu-20 ezilaliswe esibhedlela seKwekwe ngemva kokuba uTilwe Kofi epheke amahewu elima emavikini amabili adluleyo kuyonale inyanga.
UMthunywa uxhumane lesinye isakhamuzi sakule indawo uMnumzana Tinashe Zhou obike ukuba kuliqiniso ukuthi kulabantu abanatha amahewu bagula kwafa umntwana oyedwa.
“Izakhamizi zazimenyiwe elimeni lokulima emasimini ngesikhathi ziwelwa ngamashwa la. Omunye waqala ukukhala ngesisu eqeda kunatha amahewu ikanti inengi lalivele seliwanathile kanti kukhona okufakiweyo. Abantu abangu-20 baqala ukugijiswa yizisu bagijinyiselwa esibhedlela seZhombe lapho abadluliselwa khona eKwekwe hospital. Umntwana wesinye isakhamuzi wasweleka eselaliswe eKwekwe lapho okwavela khona ukuthi kukhona obekufakiwe pakathi kwamahewu la,” kutsho uMnu Zhou.
Uqhubekele phambili waveza ukuthi njengezakhamizi balemibuzo engapheliyo ngesenzo lesi.
“Lokhe sizibuza ukuthi kwahamba njani sibili ukuze amahewu la abe letshefu. Okwakhathesi izakhamizi ezanatha lawo mahewu zisesibhedlela seKwekwe ziyagula kakhulu, asazi kumbe bazabangcono.”
Iphephandaba likazulu lizwe ukubana amalima okuncedisana emasimini ahlala esenziwa esigabeni lesi kunathwe amahewu kungaphela umsebenzi kodwa lokhu okwehlele isigaba kubaqede amandla.
UMthunywa uxhumane lomunye umama ozichaze ngokuthi nguMaNdlovu oveze ukuthi bamadolo nzima ngesenzo lesi.
“Lokhu okwenzakala emzini kaKofi kwasiqeda amandla ukuthi kuhamba njani. Amapholisa asadingisisa ngodaba lolu ukuthi ongabe wafaka umuthi ngubani kodwa kakatholakali,” kutsho uNkszn Ndlovu.
Online Reporter