Online Reporter
Ethel Ncube
ZIZABE zisiwa koBadala, eNyathi ngoMgqibelo lapho iqembu le-Iyasa elizabe lijabulisa khona abantu, lihamba labanye oDJ.
Iqembu leli lizakube lisebenzisana loDJ Jefter loGrooveman, eRoyal Bar koBadala, lisenza elidume ngakho.
Intatheli ixhumane lomqondisi weqembu le-Iyasa uNkululeko Dube, obike ukuba uzulu kabuye azozijabulela.
“NgoMgqibelo siyabe siseNyathi koBadala, kuyabe kukholiswa khonale. Abantu abanengi kulindawo abakaze basibone mathupha kungakho siyabanxusa ukuba babuye bazosibona sijayiva, besibukele ngamehlo abo, hatshi ukutshelwa kumbe ukuzwa ngomunye. Siyabe siphethe istayila esitshisayo, sijabulisa abalandeli bethu,” kubika uNkulululeko.
Uqhubekele phambili enxusa uzulu ukuba abuye azobasekela.
“Singaba yini ngaphandle kwenu balandeli, yini elisiphakamisayo njalo umsebenzi esiwenzayo siyenzela ukujabulisa lina. Nxusa umngane, umakhelwane, lonke libuye lizobona iqembu le-Iyasa, ungatshelwa ngomunye kodwa sithi sondela eduze uzophakamisa iqembu lakini.
“Sifisa nje ukuthokozisa abalandeli bethu sibakhumbuze insuku zabo zakudala, sibaphakulele lokutsha esilakho.
“Iqembu ngelenu, umculo esiwuhlabelayo ngowenu, buyani lizokuzwa ukuba siphetheni. Okunathwayo kuyabe kukhona, uyabe ubukele ngapha uqandisa lomphimbo, okwakho yikuza lesikhwama sakho. Asihlanganeni koBadala eRoyal bar, ngoMgqibelo ntambama ngo6pm, siyejabula labanye. Akubizwa ozwayo, esikwaziyo yikuthi abazabe bekhona bazasuka bejabulile, luluju lodwa,” kuphetha uNkululeko.
