Online Reporter
Zimpapers Sports Hub
KULABESIFAZANE abakumdlalo wokugijima abalitshumi abazathola isipho sokubhadalelwa indleko zesikolo eze-US$150 munye ngamunye kumqhudelwano weQueens and Wings Track and Field Meet, enkundleni yeWhite City ngoNtulikazi.
Kulumncintiswano, ozaqhutshwa mhlaka 5 Ntulikazi, kuzagijima abesifazane bodwa. Loba isipho semali lesi sikhanya sisincane, siyisitshengiselo sokuzimisela ekuncediseni abesifazane abakumdlalo wokugijima ukuthi baqine njalo ngezifundo zabo.
Abaqoqi bomqhudelwano liqula leQueens with Wings, eliseMelika. Ukuqoqwa komncintiswano lo kuzabe kungokwakuqala kuleli. Umncintiswano awunikezi nje kuphela inkundla yokuncintisana eqondene labesifazane kuphela, kodwa ugcizelela kakhulu ukuqakatheka kwemfundo.
“Lokhu kungaphezu komdlalo nje, yinkundla yokukhuthaza, ukuphakamisa, kunye lokudala inguquko empilweni yabesifazane,” kutsho uWatson Madanyika, umgcinisihlalo weBulawayo Athletics Board.
Iqula le-Queens with Wings selike laqhuba umqhudelwano efanayo e-Ohio laseTexas okweminyaka emithathu edluleyo.
Inhloso yabo igxile entweni ezibalulekileyo zokuhlonipha, ukwenza kuhle, ukupha, ukugcina izethekeli lokusebenza ngokubambisana. Konke lokhu kuzabonakala ngokugcweleyo koBulawayo njengoba bedlulisela umthelela wabo kuleli.
“Ukufakwa kwesipho sendleko zemali kuzatshintsha impilo zabagijimayo kakhulu. Kutshengisa ukuthi ezemidlalo zingaba yinsika yokuphumelela kwalabo abagijimayo, baphinde baphumelele lasezifundweni. Siyaziqhenya ngokuba yingxenye yohlelo oluvulela abadlali bethu iminyango ngaphakathi langaphandle kwe-track. Loba imali incane, ilomthelela omkhulu kakhulu,” kutsho uMadanyika.
Kukhangelelwe ukuthi iWhite City igcwale phamu ngababukeli. Ukuhlanganiswa kwemincintiswano yezinga eliphezulu, ukusebenzelana kwamazwe lokusekelwa kwezemfundo kwenza umqhudelwano lo ube lithuba lokuguqula abagijimayo kwabesifazane kuleli.
