Online Reporter
IMALI ngempela yimpande yesono. Lezinsuku kunengi okubi abantu abaphatheka kukho ngesizatho sokuba abantu bayabe befuna imali.
Ngitsho lomunye wabafundi bakaJesu, uJudas Iscariot wamthengisa ngoba efuna yona imali. Umuntu angaba lemali, isikhathi esinengi iyamguqula. Atshintshe indlela abesenza ngayo izinto lokunye.
Abanye baze bazimisele ukuchitha igazi ngenxa yokufuna yona imali eyimpande yesono.
Ngike ngathi ngihleli ngekhaya ngilesizungu nanku phela lomakhalekhukhwini wami wayengasebenzi, kwathutsha umngane wami wathi singene edolobheni siye kwenye indawo yokuzithokozisa ukuyakwehlisa amadino kuleqembu eligidayo.
Sangena emveni kokuba ahlawule, sahle safika lembila zithutha laba osisi babegida benqunu bengembethe lutho ngitsho sibi somsisi. Amadoda ayelapho ayephethe etshaya imvokloklo bethatha izithombe ngabomakhalekhukhwini babo kutshengisa ukuthi ukugida kwabosisi abanqunu laba kuyabaqumbaqumba.
Umhlolo lo wangethusa, ngezwa ngisenyanya ngoba ngikhuliswe ngitshelwa ukuthi umuntu wesifazane uyahlonitshwa njalo isitho sakhe sangasese akumelanga sibe segcekeni ukuthi yiloba ngubani uyasibona. Lokhu kuyazila.
Isimanga yikuthi osisi laba babezigidela bengagqize qhakala baze bagiqike batshaye amanqetshane, amanye amadoda aze asondele ayebabamba.
Lokhu ke yikho okwahle kwangixotsha, ngoba ngasengilibona iSodoma leGomora, ngazitshela ukuthi nxa kusenzakala into ezinje mfundiso bani esiyitshiyela intsha. Ngeqiniso ngokuhamba kwesikhathi kuyabe sekungumhlambi kazelusile.
Ayixabene.
