Online Reporter
Brandon Moyo
UKAPUTENI wamaChevrons kuma-T20Is uSikandar Raza uthe uyajabula ngendlela abadlala ngayo leqembu le-Afghanistan, kumdlalo weT20I, loba benqotshiwe.
AmaChevrons anqotshwe ngama-runs ayisitshiya galolunye kumdlalo wokucina lo.
Loba bekhulelwe yi-Afghanistan, uRaza uthe kube ngcono ngoba abadlali batshaye ibhola kakuhle emdlalweni wokucina. Amazwe womabili adibana kumaT20I amathathu. AmaChevrons anqotshwe kuwo wonke.
“Ngiyathaba ukuba sitshaye kuhle ibhola emdlalweni wesithathu. Sehluleke ukwenza lokhu kumidlalo yakuqala.
Phambili kwalumdlalo, ngitshele abanye abadlali bethu ukuthi iqembu lidinga ukuthi benze kuhle. Sizimisele ukuthi sidlale kuhle, sithole imiklomelo engcono,” kutsho uRaza.
Kumdlalo wangeSonto, amaChevrons ebegijimisa i211 runs. Akhitshwe kuwo wonke ele-201 runs kuma-over angu-20. Kudlale kuhle uRaza, uthole 51 runs, kumabhola angu-29.
UBrian Bennet uthole 47 runs kumabhola angu-31, uRyan Burl ubele 31 runs kumabhola angu-15.
URaza uthe uBurl ubeyinsika kulumdlalo.
“Akwenzileyo uBurl kuphakamise iqembu. Indlela adlale ngayo yiyo ekade siyikhangelele kuye.”
IZimbabwe isiqedile imidlalo yayo yekhaya lonyaka. Kumdlalo olandelayo, izadlala lePakistan leSri Lanka kuT20I. Imidlalo le izabe isedolobheni leRawalpindi laseLahore kusukela mhlaka 17 kusiya ku 29 Lwezi.
URaza uthe bazalungiselela ngesikhathi esifitshane esikhona.
“Sileviki elilodwa ukuthi silungiselele umdlalo olandelayo. EPakistan kumele sifike sidlalele ukunqoba, ngakho umbono yikwenza kuhle yonke indawo,” kutsho uRaza.
Kumdlalo wakuqala, amaChevrons azadibana lePakistan eRawalpindi Cricket Club mhlaka 17, qede lapho idlale leSri Lanka mhlaka 19, enkundleni efanayo.
Azadlala lePakistan kumdlalo wesibili eGaddafi Stadium, eLahore mhlaka 23 Lwezi.
Amaqembu amabili azaphuma elemiklomelo ephezulu azadibana mhlaka 29 Lwezi. AmaChevrons acina ukuvakatshela ePakistan ngo2020 lapho adlala khona ama-ODI amathathu lamaT20Is. IPakistan yanqoba amaT20Is 3-0. Yanqoba njalo kuma-ODI nge 2-0.
