Nkosilathi Sibanda
ABABONA ngezomumo womkhathi i-Meteorological Services Department (MSD) babika ukuthi kukhangelelwe ukuba kuzakuna izulu elilomoya omnengi ngoLwesibili emini ikakhulu kuzabelo zeMatabeleland.
Uzulu uxwayiswa ukuthi aqaphele ngoba kungaba lesiqhotho, umbane lezikhukhula kwezinye indawo ezabelweni eziyisikhombisa zelizwe, okugoqela iMatabeleland South, Matabeleland North, Bulawayo, Midlands, Masvingo leManicaland.
“Izulu leli likhangelwe ukuthi liqonde enyakatho yelizwe lapho elizakuna khona eHarare, lezinye indawo zeMashonaland ezizathola izulu elimoya omkhulu ngoLwesine mhlaka 29 Mfumfu.
“NgoLwesithathu, kuzakuba lomoya, ovela ezansi usiya empumalanga. Izulu elilomoya lomdumo lizakuna enyakatho lapho elizakuba sendaweni eziseHarare, Manicaland lazo zonke izabelo zeMashonaland kusiyafika ngoLwesine 29 Mfumfu,” kutsho iMSD.
Inhlanganiso le, ixwayise ngokuba kuzakuba lezikhukhula endaweni eziphansi. Umoya lo kuthiwa ulakho ukubhidliza izilimo, uphahla lwezindlu lezinye izakhiwo ezingaqinanga.
Abantu bacelwa ukuthi bahlale ezindlini nxa izulu elilomoya lisina njalo bangacatshi ngaphansi kwezihlahla nxa kulombane.
