Online Reporter
Brandon Moyo
BAQHUBEKA besenza kuhle abadlali beWestern Panthers kumncintiswano weligi yeBulawayo Metropolitan Rugby Football Board (BMRFB) Archer Clothing Under-20, nanko banqobe 24-21 phezulu kweOld Miltonians, enkundleni yeHartsfield koBulawayo ngempelaviki.
Bekungumdlalo onzima kumaqembu womabili agijimisa isicoco njalo eseqede imidlalo eyisithupha enganqotshwa.
Idlale sengathi badlala okokucina. Benelise ukuphenduka emdlalweni ngesigaba sesibili, okutsho ukuthi sebenqobe imidlalo eyisithupha ilandelana. I-Old Miltonians sebenqobe kahlanu.
Umdlalo lo ungene isikhathi sekhefu iOMs ikhokhela nge 14-0 kodwa iPanthers iphenduke ngesitayila itshaya ama-tries amane ngesikhathi iOMs isixegise igiya.
Kulandela umdlalo wangoMgqibelo, iPanthers yilo lodwa iqembu elingakanqotshwa kuma-Under 20.
Okwakhathesi bazikholisela ukukhokhela ngemiklomelo eyisitshiya galombili kulogu.
Umqeqetshi weqembu George “Rollo” Mukorera uthe bacina sebetshintsha ukwenza bedinga ukuthi banqobe.
“Bekungumdlalo ongekho lula. Siqalise ngabafana abancane kodwa kabazange benze kuhle. Sicine singenisa abakhulu abafike badala utshintsho.
“Iqembu ebesidlala lalo belilama-scrums aqinileyo kodwa senelise ukubabamba lapho,” kutsho uMukorera.
Wengeze wathi nxa bezafuna ukuyaphambili, kumele abadlali bakhe bazibambe.
“Konke kuya ngokuzithoba nxa sifuna ukunqoba. Abafana bami bengenza okungcono nxa bengalolonga njengeqembu.”
Kweminye imidlalo, iBulldogs inqobe okwakuqala emincintiswanweni ngokutshaya iMatabeleland Lions 20-12. IChristian Brothers College (CBC) inqobe iHighlanders 28-10. Kuhlandla labesifazane, iPanthers inqobe iHighlanders 12-10.
Kube lomunye umdlalo phakathi kweProbables lePossibles lapho iPossibles ithole imiklomelo yonke inqobe nge25-15. Imidlalo le izasetshenziswa ukukhetha abadlali be2025 Nedbank Rugby Challenge eHarare.
Kusenjalo, iPitbulls leFS Raiders ziqede zizintshantshu ku2025 Harare Province Paramount Garments Under-20 kwabesilisa labesifazane.
Kwabesifazane, iFS Raiders itshengise ukuthi iqinile isehlula iZimbiru U-20 nge 30-15. IPitbulls inqobe iOld Hararians 33-17. Ngokunqoba lokhu, iqembu leli selinqobe okwesitshiya galombili kumidlalo eyisitshiya galolunye.
