Online Reporter
ZINENGI izigigaba ezihlasimulisa igazi ezenziwa ngosomabhizimusi labanye abathengisayo ukuze izinto zabo zithengwe, okunye umuntu usuka azibuze ukuthi kambe liqiniso sibili ukuthi abantu bayakwenza na lokho ukuze bathole inotho?
Asazi, kunzima okwenzakala lapha phandle, yikufuna imali konke lokhu, kodwa nxa kuliqiniso lokhu abantu kababe lenhliziyo hatshi ukudlisa abantu ingcekeza, okunye ukudla okuthengiswa ezitaladeni umuntu ungakudla utshona eselele phansi ngesisu sesimgijimisa.
Njengoba lisadliwa nje ihlobo sitshayisana labo abathengisa indlubu, amazambane, umumbu lokunye okuphekiweyo okuyabe kukhudumala. Inengi lihle likweqele phela sokulokungumqando kulezinsuku kufuneka ezikhudumalayo ezifela emlonyeni.
Okubuhlungu yikuthi abantu abathengisayo bathengisa umumbu osulamalanga amathathu uphekiwe, uyabe ulokhu ukhudunyezwa kuphela usuze usonakala. Kabacabangeli labo abazawudla ukuthi mhlawumbe bazaguliswa yikudla kwabo.
Yebo khona uyabe usulahlekelwe yinzuzo nxa sokonakele kodwa ngubani okumele adle ingcekeza?
Abanye njengoba bethengisa ngokungekho emthethweni ukudla lokhu njengerenkini laphakathi khonapha edolobheni ukudla kwakhona kufihlwa endaweni ezesabekayo eziphihlika ingcekeza.
Kube lalaba abathengisa imibhida emakethe hatshi bakithi, iyabe igcwele phansi ngapha kulodaka olulengcekeza eyesabekayo, lomnuko uthi khonapho. Abanye ufica sebeyiqamele lokuyiqamela khona emakethe bangakutshayi indiva ukuthi abantu bazayithenga besiyapheka.
Ukuhlanzeka kubalulekile bakithi, kuyathengwa njani ukudla kwakho nxa kungakhangeleki? Kuthengiswa duzane lengcekeza eyesabekayo. Yikho-ke lapho omunye ubona engathengelwa seqala ukuganga esiyadinga imithi yokuthi athengelwe.
Uzwe sokuthiwa uNaSibhence nxa epheka umumbu wakhe ufaka isikhindi ngaphansi ukuze kuthengwe, abanye omama kuthiwa bachela abakuthengisayo ngamanzi abageze ngawo ngaphansi.
Nxa kuyikho elikwenzayo bathengisi hatshi akelicabangele abanye abantu. Wena kunguwe ungezwa njani udliswa ingcekeza enjalo.
Akube ngabantu abazixoxelayo nje ukuthi yinto elizenzayo lezo ngoba nxa kuliqiniso sibili kuyikho elikwenzayo lizikhuze, isiqokoqela yikuhlanzeka ukuthi ibhizimusi ihambe, hatshi imithi. Asikhulumi ngabamabhizimisi esizwa kuthiwa bayabulala abantu bacuye izitho besiyalungiselwa imithi zinswelaboya zezinyanga ukuze amabhizimusi abo ahambe.
Hayi bo bantu bakithi asekeleni ukuthanda inotho evuka ikhona ngosuku olulodwa, ukusebenza nzima nje qha kuyabhadala. Ukwakha ubukhosi bakho mbijana mbijana kuyanceda ngoba kwenza lokuwa kwakhona kungabi lula ngoba usazi amaqhinga okubamba nxa izinto sezisima manzonzo.
