Online Reporter
Nkosilathi Sibanda
ULWAZI olumayelana lokudla kwesiNtu kalusoke lutshabalale nanko kuzethulwa ugwalo olwalotshwa ngumuyi uNaison Tfwala, olumumethe okunengi okuzaphathisa ukuthi ulwazi lolu ludluliselwe kuzizukulwana ezizayo.
Ugwalo lolu luzethulwa mhlaka 26 Mpandula eSamaritans koBulawayo emini.
Umcimbi lo uqoqwe yiTfwala Nation njalo uhlose ukugcina ulwazi lwesiNtu olumayelana lokudla, indlela okulungiswa ngayo kanye lokuqakatheka kwakho empilweni.
Isihloko somcimbi lo sithi: “Ukudla okwakha umzimba, ukudla kwabantu, umuntu ngumuntu ngokudla.”
Kusandulelo sogwalo, esiphethwe liphephandaba likazulu, uTfwala uchaza ukuthi ulwazi lokudla lufundwa kakhulu emulini, lapho abantwana abathola khona ulwazi kubazali, labadala lakulabo abahlala labo.
Uthi abantu bayafundiswa ukuthi yikuphi ukudla okungadliwa kungaphekwanga, yikuphi okumele kuvuthwe kanye lendlela yokunanzelela ukuthi ukudla okuthile sekulungele ukudliwa.
Kugwalo lolu, kwabiwa njalo ulwazi olumayelana ngomumbu, imfe, lamabele, echaza izigaba ezehlukeneyo zokukhula kwalezi zilimo lokusetshenziswa kwengxenye zazo njengokudla kwabantu, ngesikhathi ulwazi olunengi ngokudla kwesiNtu solutshabalala, ikakhulu kwabasakhulayo.
