Online Reporter
Nkosilathi Sibanda
UHULUMENDE uhlose ukukhweza inani lengulube ezifuywe kuleli, njalo kukhangelelwe ukuthi kusiyafika u2028, kube lengulube ezifika i256 000 elizweni.
Umqondisi omkhulu kugatsha lwe-Agricultural and Rural DevelopmentAdvisory Services (Ardas), uNkosikazi Medlinah Magwenzi uthe lokhu kuzakwenziwa, isizatho salokhu yikukhuthaza abalimi ukuthi bavule amabhizimisi ngokufuya lokuthuthukisa ukutholakala kwemali kubalimi.
“Ibhizimusi lokufuya ingulube lilamandla amakhulu okuncedisa ekukhuliseni umnotho welizwe. Sifuna ukubona abatsha labesifazane bengena kakhulu kuloluhlelo,” kutsho uNkosikazi Magwenzi kumbiko wakhe obekwe kukhasi logatsha lweLands, Agriculture, Fisheries, Water and Rural Development ebulenjini.
Ubuye wagcizelela udaba lokudla kwezifuyo, ebika ukuba kubalulekile ukukhulisa ukulinywa komumbu le-soya elizweni ukuze kwehliswe indleko zokufuya ingulube.
UNkosikazi Magwenzi uthe kumele kuthuthukiswe lenhlelo zokuqinisa ukuvikelwa kwezifo (biosecurity).
Uthe kudingeka imithetho ecacileyo njalo ebambekayo kunye lokusebenzisana okuqinileyo phakathi kukaHulumende, abalimi labanye.
Uthe ukusebenzisa imininingwane eqondileyo kuzanceda ukulandelela ingqubekela phambili ukuze kufezwe inhloso ka-2028.
Ukukhula kwebhizimusi lokufuya ingulube kulindeleke ukuthi kudale amathuba emisebenzi, kwehlise ukuthembela ekungeniseni inyama yengulube evela phandle kwelizwe.
