admin
Cornelius Luphahla
IZAKHAMIZI zeBellevue koBulawayo sezisungule inhlanganiso yokwelapha ngezihlahlakazana ezivela emazweni aphetsheya nanko phela kukhanya inengi labantu selisila khona.
Inhlanganiso le yiNatural Herbs for Life Trust esebenza ihlangene lekhansili yakoBulawayo kanye lezinye inhlanganiso ikakhulu ezikhangela ngamalungelo abesifazana ngakho ke isiqalile ukulungisa amaphilisi ngezihlahla lezi.
UMthunywa ukhulumisane loMqondisi wale inhlanganiso uNkosikazi Dainah Ndoro ochaze ukuthi inhlanganiso le silesikhathi bayisungula.
“Inhlanganiso le sayisungula ngo2006 njalo sisebenza sincediswa yiMatabeleland Aids Council, Bulawayo City Council, kanye leMinistry of Womens Affairs Gender and Community Development. Ngalokhu sisebenza singamalunga ayisithupha, obaba abathathu labomama abathathu,” kutsho uNkkz Ndoro.
UNkkz Ndoro uqhubekele phambili njalo wachaza ukuthi ukwelapha ngezihlahla lokhu wakufundela kwele United Kingdom.
“Ukwelapha ngezihlahla lokhu ngakufundela eUnited Kingdom ngakho ngilezithupha ezintathu.
“Imithi yethu esiyilungisayo yelapha imihlobo yonke yemvukuzane, ubuhlungu besisu, ukuvuvuka inyawo, amazinyo, isifuba kanye leminye imikhuhlane etshiyeneyo. Ngikhuluma nje sebebanengi kakhulu abantu esabelapha basila okuchaza ukuthi imithi yethu iyasebenza. Ngakho sesiqalisile ukulungisa amaphilisi ngezihlahla zethu ukuze abantu abanengi bathole usizo.
“Okunye njalo sesathenga imitshina yokumasaja (massage) abantu ababulawa yimikhuhlane etshiyeneyo efana lenyawo kanye lomzimba,” kutsho uNkkz Ndoro.
UMnumzana James Ndoro ubikele intatheli ukuthi uhlupho abalalo yikuswela imali yokutshonisa isibholane sabo abathelela ngaso izihlahla zabo.
“Noma nje inhlanganiso yethu isiza abantu abanengi kodwa uhlupho esilalo yikuthi isibholane sethu sesiphela amanzi ngakho sesisehluleka ukuthelela izihlahla zethu okuyikho okudala ukuthi siswele esingasiza ngakho abantu. Ngalokhu ke isifiso sethu yikuthi ngabe ezinye inhlanganiso ziyangenela zisize ukuze siqhubeke sisiza abantu,” kutsho uMnu Ndoro.
Ekhuluma lentatheli uProvincial Development Officer Ministry of Woman Affairs, Gender and Community development uNkosikazi Vaidah Mashangwa uthe kuyajabulisa ukubona inhlanganiso etshengisela ukuthuthuka okukhulu kwezokwelapha.
“Inhlanganiso le itshengisa ukuthuthuka okukhulu ngoba abantu abanengi abafika lapha bayasila okuchaza ukuthi imithi yabo iyasebenza kakhulu. Ngalokhu ke sibakhuthaza ukuthi baqhubekele phambili besiza abantu,” kuphetha uNkkz Mashangwa
Online Reporter