admin
Bongani Ndlovu
ABALIMI beZimbabwe sebekhuthazwa ukuba bafuye ingulube ngoba iyibhizimusi enhle njalo elakho ukuletha imali yangaphandle eZimbabwe.
Ekhuluma loMthunywa uMnumzana Cosmas Muzunde onguLivestock Production Officer esabelweni seMatabeleland North uthe ibhizimusi yokufuya ingulube iyadlisa kweleZimbabwe ngoba inyama yengulube ithengiseka emkambo wakuleli langaphandle kwelizwe.
“Abalimi kabafuye ingulube ngoba kuyibhizimusi enhle eZimbabwe, inyama yengulube iyinyama elomkambo omkhulu ngoba idumile ngokutshipha kwayo lapho itholakala.”
“Ubuhle ngengulube yikuthi azivumi kizo zonke indawo zomhlaba okutsho ukuthi ingulube umkambo wayo uyadlulela phandle kwelizwe okungasiza ekuthuthukiseni isimo somnotho ngokuletha imali yangaphandle kwelizwe,” kuchaza uMnu Muzunde.
UMnu Muzunde uphinde waveza ukuthi ingulube ziyanda ngesikhatshana nje.
“Ukwanda kwengulube akuthathi isikhathi ngoba ingulube eyodwa izala kabili ngomnyaka. Ingulube inhle ngoba ekuzaleni kanye iyenelisa ukuba lemidlwane elitshumi lanye okutsho ukuthi ngomnyaka owodwa iyaba lemidlwane engamatshumi amabili lambili.
“Lokhu kuveza ukuthi umlimi uyayithola inzuzo ngesikhatshana nje,” kutsho uMnu Muzunde.
Obunye ubuhle ngokufuya ingulube yikuthi ziyathengiseka ngemva kwenyanga ezine kusiya kunyanga eziyisithupha.
“Umlimi uyenelisa ukuqala ukuthengisa ingulube ngemva kwenyanga ezine kusiya kweziyithupha ikakhulu nxa ethengisela amabhutsha kanye lezitolo ezithengisa inyama.
“Inyama yengulube ezithengiswa ngemva kwenyanga ezine ibuthakathaka njalo ithakazelelwa ngabantu abanengi,” kuchaza uMnu Muzunde.
UMnu Muzunde uphinde wathi inyama yengulube ilomkambo eZimbabwe kanye langaphandle.
“Inyama yengulube iyathengiseka eZimbabwe ngoba ithandwa kakhulu endaweni zokosa, langaphandle kwelizwe umkambo wengulube muhle kakhulu ngoba inengi labantu liyayithakazelela,” kutsho uMnu Muzunde.
“Kusiya ngenzuzo efunwa ngumlimi, umlimi ulakho ukufuya ezinsikazi ezingu-20 aphinde afuye enduna eyodwa, ngemva komnyaka umlimi angakwanisa ukuba sephinde isibaya sakhe kabili,” kuphetha uMnu Muzunde.
Online Reporter