admin
Ukuphumelela kwelizwe yizisebenzi zonke zikaHulumende, kaziphiwe iholo elihle.
Bakwethu sonke siyazi ukuthi ukuze sibalwe phakathi kwabantu kungenxa yolwazi esaluthola esikolo.
Sonke siyazi njalo ukuthi ukuze umuntu athole ukubalwa emphakathini kuyadingakala ukuthi abengumuntu osewake wathi qoki esikolo wayathola ulwazi olulakho ukumsiza empilweni. Kumqoka njalo ukuthi sinanzelele ukuthi ngabe akulabantu esibabiza sithi ngababalisi ngabe sonke siyiziwula nje ezingazi lutho.
Kunengi osokuhlasele ilizwe lethu ngendlela ezwisa usizi okugoqela ukungaholi imali eneleyo kwabantu abatshiyeneyo, ubugwelegwele lokunye okunengi okudinga ukulungisiswa.
UHulumende kumele akhangelisise mhlawumbe uzabona ukuthi loba izinto zinzima bakhona abantu abalokhu besazimisele. Abantu laba basebenza gadalala mihla lemihla beqhuba imisebenzi yabo.
Imisebenzi yonke jikelele iqakathekile kungadingakali ukuthi umuntu wenza wuphi umsebenzi. Ababalisi ngabanye abantu abaqakathekileyo njalo abadingakalayo nsuku zonke njalo isizwe ngeke saphumelela bengekho kungakho-ke kuyadingeka ukuthi baphiwe iholo elingcono.
Abantu laba ngabantu abaqeqetsha emakolitshini kungakho ke kumele batshengiselwe ukuthi bayahlonitshwa baphathwe ngesihle ukuze bangasuki kuleli sebesiyadinga imisebenzi kwamanye amazwe. Banengi asebasuka kweleZimbabwe ngenxa yemali abayiholayo besiyadinga imisebenzi eBotswana, South Africa lakwamanye amazwe.
Ukuze umuntu abe ngudokotela, manjinela, mongikazi loba nje yiwuphi umsebenzi ongawucabanga usuka ezandleni zombalisi kodwa-ke lezi izisebenzi kukhanya sengathi yizo ezikhangelelwa phansi kulazo zonke izisebenzi zikaHulumende. Kuyadingeka-ke ukuthi kube sobala ukuthi izisebenzi zonke zikaHulumende ngokutshiyana kwemisebenzi yazo ziqakatheke ngokufanayo, asikho esingcono kulesinye ngoba umsebenzi waso wenza kube lentuthuko elizweni lakithi.
Kungumbono waleliphephandaba ukuthi uHulumende kumele aphathe izisebenzi zakhe zonke ngendlela efanayo kungabi lezinye okukhanya angathi zingcono kulezinye ngoba lokhu kucina kusenza kube lezisebenzi ezizibona angathi ziqakatheke kakhulu njalo akukho okungenziwa kuzo. Lezo zisebenzi zicina zibona angathi zingakhalala imisebenzi konke kuzakuma kuthi ntsi elizweni.
Inhlupho zemali yebo zikhona elizweni, zidinga ukulungisiswa ngokuphangisa ukuze izisebenzi zingaphaphatheki zibalekele kwamanye amazwe zitshiya elabo. Kuyinto ebuhlungu sibili kizo izisebenzi ukuthi phezu komsebenzi eziwenzayo beseziphiwa imadlana engelakho ukubaphutshisa inyanga. Zinengi izisebenzi esizaziyo eziphila ngokweboleka imali le abayithi yizimbazo ngenxa yokuthi imali yabo kayifiki ndawo.
Kalilungiswe iholo lezisebenzi ngokuphangisa singakalahlekelwa yizisebenzi ezilohlonzi. Kaziphiwe imfanelo zazo izisebenzi zikhululeke ukuze ilizwe lithuthuke kwelakusasa.
UHulumende akabhekisise indaba le ngobunono kuhlalwe phansi kukhulunyiswane inhlupho zezisebenzi nje zonke jikelele zilungisiswe ngokuphangisa.
Online Reporter