Online Reporter
Bongani Ndlovu
KULABANTU abalitshumi lasificamunwe munye abalimeleyo, ngemva kokubhewuka kwebhasi akade beyigadile phambi kweChipangali Wildlife Orphanage kumgwaqo oya eGwanda kukanti njalo kulabane abafe ngemva kokungqikilana kwebhasi ye-Inter Africa leHonda Fit emgwaqweni osuka koBulawayo usiya eHarare.
Ingozi lezi zenzakale ngoLwesithathu.
Kubikwa umtshayeli webhasi ebisiya eMutare wehluleke ukuyiqondisa yaphuma umgwaqo yabhewuka.
UMphathi weBulawayo Fire Brigade uMnumzana Mhlangano Moyo uqinisekise ingozi le wathi akulambiko yokulahleka kwemiphefumulo.
“Ibhasi ibithwele abantu abangu-21 ngesikhathi umtshayeli esehluleka ukuyiqondisa yasibhewuka,” kutsho uMnu Moyo.
Uthe abantu abangu-19 balimele, ababili babo balimele kakhulu njalo bagijinyiselwe esibhedlela se-United Bulawayo Hospitals.
Uthe abezimo eziphuthumayo babuye baveza ukuthi ibhasi isesimeni esiqondileyo.
Kusenjalo, kulabantu abane abadlule emhlabeni abanye balimala ngesikhathi ibhasi ye-Inter Africa ingqikilana le-Honda Fit lapho okuhlangana khona umgwaqo wakoBulawayo usiya eHarare loCecil Avenue koBulawayo ngoLwesithathu ekuseni.
Ingozi le yenzakale ngemva nje kwehola lokuqala ekuseni.
IHonda Fit itshayeke kakhulu ngesikhathi ingqikilana lebhasi, yona ephume umgwaqo yayakuwa ngomhlubulo.
UMphathi weBulawayo Fire Brigade uMnumzana Mhlangano Moyo uqinisekise ingozi le, wathi iHonda Fit ibisuka kuCecil Avenue njalo kubikwa yehluleka ukubamba imiqobotsho.
“Ibhasi ibisiya entshonalanga kuHarare Road ngesikhathi ingqikilana leHonda Fit ebisiza lapho okuhlangana khona umgwaqo isuka kuCecil Avenue,” kutsho uMnu Moyo.
Uthe iHonda Fit yonakale kakhulu, kwathi ibhasi yaphuma emgwaqweni yayakuwa ngomhlubulo eceleni komgwaqo.
Uthe owesilisa obehlezi kuHonda Fit ulimale kakhulu ekhanda njalo ugijinyiselwe esibhedlela seMpilo Central Hospital.
Abesifazane abathathu akade begade ibhasi abalimeleyo bona basiwe esibhedlela se-United Bulawayo Hospitals (UBH).
“Abesilisa abane bahle bedlula lapho okwenzakale khona ingozi. Bebebanjwe zinsimbi zemota njalo bakhutshwe ngabeFire and Rescue Services,” kutsho uMnu Moyo.
Uthe abalimeleyo baqale bancediswa lapho okwenzakale khona ingozi bengakahanjiswa ezibhedlela.
“Izigulane ezintathu zelatshwe endaweni yengozi zasezithathwa zasiwa eUBH, kwathi esesine sasiwa eMpilo. Izidumbu zabantu abane zihanjiswe emapholiseni,” kutsho uMnu Moyo.
