Online Reporter
Nkosilathi Sibanda
NGEMPELAVIKI iligi yeCastle Lager Premiership ingena kuviki lesibili njalo umdlalo olindwe ngabanengi ngozabe uphakathi kweDynamos leHighlanders, ngeSonto enkundleni yeRufaro.
Zombili zihlangana okwesibili lonyaka kulandela ukudibana kunkezo yeJairos Jiri kumaviki adluleyo.
Amaqembu la ayizitha okwaziwayo ukuthi akula elifuna ukwehlulwa ngelinye kalula njalo ukubaluleka komdlalo lo kukhulu kubathandi labalandeli bomdlalo kuleli.
Umdlalo lo uza ngesikhathi amaqembu womabili esazama ukwakha ijubane kumbango weligi.
IDynamos, lomqeqetshi wayo uGenesis Mangombe ithole ukukhuthazeka ngemva kokubuya emuva yanqoba iTelOne FC 2-1 emdlalweni odlalwe enkundleni ye-Ascot. Lokhu kwalandela ukwehlulwa kabuhlungu nge 5-0 yi-Scottland FC kuCastle Challenge Cup, okwatshiya abalandeli beDeMbare bedanile.
Umqeqetshi weHighlanders uBenjani Mwaruwari uzakwethula umbono wakhe ngalumdlalo ngoLwesine ekuseni. Iphephandaba likazulu lithole udletshana lokuthi uMwaruwari ulolonga abadlali esazi ukuba kukhulu okumlindele eHarare.
Ngemva kokumelana labomakhelwane iBulawayo Chiefs nge 1-1 ngeSonto edluleyo, umqeqetshi weBosso lo ulomthwalo wokutshengisa abalandeli ukuthi uyenelisa ukuwuguqula umdlalo wakhe.
KowangeSonto, bakhona abangazange bajabule ngendlela uMwaruwari ayemise ngayo abadlali bakhe.
Okwesikhathi esinengi ibhola laliphethwe yiChiefs, iBosso yaze yathola ithuba lokuhlohla isiphiwe umbekwa, umdlalo usubanga emaphathelweni.
Ubukhulu bomdlalo kusekelwa njalo yikuthi amaqembu alandelwa ngabantu abanengi njalo madala kumncintiswano wenguqu kuleli.
Lanxa sekukhona amakilabhu alemali, anqoba inkezo, adlalelwa zingcitshi asethatha indawo phambili, iBosso leDeMbare zisahlezi zingamaqembu adonsa inhlonipho kubalandeli.
Umqeqetshi we Dynamos, uGenesis Mangombe uthe umdlalo walonyaka uzakwehluka ngoba womabili amaqembu angene isizini entsha eguqule abadlali labaqeqetshi.
“Sibhekane lomdlalo omkhulu la. NjengeDynamos sibumbe iqembu elitsha eliqinileyo. LakuHighlanders kunjalo, kulabadlali labaqeqetshi abatsha,” kutsho uMangombe.
“Kumele kube lomoya ophezulu ngoba imidlalo le ibalulekile emisebenzini yethu labalandeli bethu. Inkundla yeRufaro izagcwala abalandeli bethu abafuna ukunqoba.”
UMangombe uthe ukunqoba kuTelOne kukhuphule ukuzethemba eqenjini.
“Lokhu kusinike amandla okulungiselela umdlalo wethu leHighlanders. Sasivela ekwehlulweni okukhulu kodwa sakhuthaza abadlali ukuthi bengalahli ithemba.”
NgeSonto abalandeli balindele omunye umdlalo otshisayo njengoba amaqembu womabili efuna ukunqoba ukuze athole amalungelo okuzigqaja kumdlalo lo obizwa ngokuthi yiBattle of Zimbabwe.
