admin
Lucky Tshabalala.
IKHANSILI yakoBulawayo kanye lenhlanganiso yeVeterinary Field Services sebesungule umkhankaso wokuvikela ubhova koBulawayo ngokwehlisa inani lezinja.
Lumkhankaso ulandela ukwanda kwenani labantu kanye lezinja abatholakala belomkhuhlane wobhova. Kuzwakale ukuthi nyakenye kulabantu abedlula amakhulu amabili abalunywa yizinja ezilobhova.
Kubikwa kusukela ngoMvulo weviki edluleyo sokudutshulwe izinja ezingu- 15.
Umabhalani wekhansili uNkosazana Sikhangele Zhou wazise uzulu ukuthi ngemva kokunanzelela ukuthi inani lezinja ezihlaselwa ngumkhuhlane wobhova liyanda kanye labantu abalunywa yizinja ezingelabanikazi, sebesungule uhlelo lokuvikela ubhova ngokwehlisa inani lenyamazana lezi.
Kubikwa kusukela mhlaka 23 Mbimbitho kusiya ku 22 Mabasa izinja zonke ezitholakala zizulazula zingela banikazi zizadutshulwa.
Uthe umthetho wedolobheni leli uthi akulamuntu ovunyelwa ukuba lezinja ezidlula ezimbili kuzindlu zemalokitshini.
Uqhubekele phambili waveza ukuthi akuvunyelwa ukuthi umuntu afuye izinja nxa engelathango.
“Izakhamizi ezilemizi engabiywanga ngendlela kumele zibiye ngokuphangisa ukuze zivikele izinja ekuzuleni zize zicine seziluma abantu.
“Kuthi labo abalezinja ezedlula ezimbili kumele base ezinye emawofisini eSPCA ,” kulandisa uNkk Gumbo.
Isikhulumi sekhansili uNkosikazi Nesisa Mpofu ufakazile ukubana sebamukele imibiko yezinja ezinengi ezilobhova kukanti-ke inani labantu asebalunywa yizinja kusukela ngoZibandlela kusiya kuMpalakazi womnyaka ka 2014 ledlula amakhulu amabili.
“Ngomnyaka odluleyo kulabantu abangu-275 abalunywa yizinja ezilobhova,” kulandisa uNkkz Mpofu.
Uphethe ngokukhuthaza uzulu ukuba aphatheke ekulwisaneni lomkhuhlane lo.
“Sikhuthaza izakhamizi ukuthi ziphatheke ekulwisaneni lomkhuhlane wobhova ngoba uyingozi njalo uyabulala,” kuphetha uNkkz Mpofu.
Online Reporter