. . . Kuyasiza ukuqhuba kuhle inhlelo zokulima: ZCFU

Msilisi Dube
KULANDELA ukuna kwezulu emalangeni adluleyo, inhlanganiso ekhangele  ngezokulima eye-Zimbabwe Commercial Famers Union (ZCFU) isikhuthaze  abalimi ukuba bavune  amanzi ukwenzela ukuba benelise ukulima iloba yisiphi isikhathi somnyaka.

Kubikwa esikhathini esinengi abalimi kabalandaba lokuvuna amanzi ngakho bayalima nje okucina kubangela ukuba bathole isivuno esiphansi ngenxa yokuswela kwamanzi.

Ekhuluma lephephandaba likazulu uMnumzana Winston Babbage uthe ukuvuna amanzi kuqakathekile ngoba kwenza umlimi enelise ukulima iloba yisiphi isikhathi njalo lezifuyo lazo zilakho ukuzitholela amanzi okunatha.

“Ngenxa yokuna kwezulu elilutshwane lokutshisa kwelanga kakhulu, izakhamizi ezihlala ezigabeni ezinengi eMatabeleland  ezinjenge Lupane, Nkayi laseGwanda zibhekane lendlala enkulu lonyaka.

“Njengoba izulu lilokhe liqhubekela phambili lisina abalimi abahlakaniphileyo kumele baqalise ukukhongozela amanzi besebewasebenzisa ngesikhathi abasifunayo,” kuchaza uMnu Babbage

UMnu Babbage uqhubekele phambili wathi kulendlela ezinengi zokuvuna amanzi ezigoqela ukugebha imigelo emasimini ukwenzela ukuba amanzi agelezele khona.

“Umlimi kumele agebhe imigelo le ukwenzela ukuba nxa izulu lingana amanzi agelezele kuzilimo zakhe. Umlimi ulakho ukuthelela ngawo amanzi la ngoba izulu lakhona lilakho ukuhamba okwesikhathi eside.

“Phezulu kwalokho abalimi bangagebha amagodi atshona okungaba ngamacentimitha angu-15 njalo bangawagqibeli kakhulu ukwenzela ukuthi amanzi agelezele phakathi,” kuchaza uMnu Babbage.