Online Reporter
Brandon Moyo
UMDLALI wekhilikithi wakuleli uBrendan Taylor kubikwa usephendukile emdlalweni, kulandela ukumiswa iminyaka emithathu yinhlanganiso ye-International Cricket Council.
Ukuphenduka kwakhe kuqinisekiswe ngukaputeni wamaChevrons uCraig Ervine kuliviki, ebika ukuba umdlali lo uzakuba khona kumdlalo we-Test wesibili leNew Zealand.
Umdlalo wakuqala we-Test uqale ngoLwesithathu.
UTaylor, oleminyaka yokuzalwa engu-39, ubonakale elolonga labanye enkundleni yeQueens Sports Club koBulawayo kumalanga ambalwa adluleyo.
Ukaputeni u-Ervine uthe ukuba khona kukaTaylor kubaluleke kakhulu njalo kuzaletha inguquko enkulu eqenjini, nanko uselesikhathi eside esemdlalweni.
“Uzabe ekhona kumdlalo wesibili we-Test. Ngiyazi ukuthi usebenze kanjani kunyanga ezedluleyo ukuze akhethwe eqenjini.
Ngiyathaba ukuthi usekhona njalo silindele ukubona ukuthi uzasincedisa njani enkundleni. Lo ngumdlali olembali enhle enkundleni. Wenelisa ukuthola udumo lenhlonipho ngokudlala kakuhle. Kumele athathele khonapho aqhubeke ngokwakha ibizo lakhe,” kutsho u-Ervine.
AmaChevrons aqiniswe njalo yikuba khona kukaSikandar Raza, Ben Curran loBrian Bennett.
Kusenjalo, ukaputeni weNew Zealand uTom Latham kubikwa ulimele ihlombe, ngakho kasoze adlale. Walimala edlala iT20 leqembu leBirmingham ekuqaleni kukaNtulikazi.
Kukhangelelwe ukuthi abesengcono kusiyafika i-Test yesibili mhlaka 7 Ncwabakazi. Ozakuba ngukaputeni nguMitch Santner.
USantner (osethole 30 Test caps) ubamba lesi isikhundla esanda kuvela ekunqobeni kuT20I Tri-Series eHarare.
“Ngizizwa ngiphakanyisiwe ukuba ngukaputeni. Kube ngumnyama ukuthi uTom alimale. Usedlale kuhle kuminyaka edluleyo engukaputeni, siyambonga ngalokhu.”
