Online Reporter
Rutendo Nyeve
IZAKHAMIZI zesigaba senduna uShana bucwadlana leVictoria Falls zisele zithithibele ngemva kokuba umfana oleminyaka engu-7 yokuzalwa, u-Elroy Sigauke, etholakale efile ngendlela edabukisayo. Umfana lo kucatshangelwa ukuthi uzibulele ngokuzibophela. Okubuhlungu ngalesi sehlakalo yikuthi umfana lo uficwe ngomunye njalo olingana laye omane wagijima wayathatha ingqamu waquma intambo wabeka isidumbu sakhe phansi evulandini yangakibo.
Ngokutsho kwencwadi zamapholisa, lokhu kwenzakale mhlaka 27 Ntulikazi eMakololo kuVillage 4.
“Mhlaka 27 Ntulikazi 2025, ngehola lika 4 emini, amapholisa eJambezi abizwa kuthiwa kulo mfana oleminyaka engu-7 otholakale ezibophele eMakololo, indawo eseJambezi ngaphansi kwenduna uShana,” kutsho incwadi yamapholisa.
Ngokutsho kwalincwadi unina kamufi, uNkosazana Pamela Siyameja (29) lomkakhe uMnumzana Austin Sigauke (50) basuka ngekhaya belubhekise emalilweni batshiya lo osengumuyi labanye abantwana uTatenda Wendy (7) loOlinda Sigauke olenyanga ezingu-20 zokuzalwa bebodwa endlini.
“Owabika indaba le uNkosazana Siyameja wafika lapho ngehola lesine emini wathola isidumbu sikaElroy silaliswe evulandini.
UNkszn Siyameja wabikela amapholisa eJambezi ahle afika endaweni yesehlakalo ananzelela isilonda ngemuva kwekhanda likamuyi.
“Amapholisa akhuluma loTatenda Wendy ngokwenzakalayo wabika ukuba umuyi uzibophele ngebhanti ku-screen door ye-tuckshop okuyindawo engaba ngumango ongamakhilomitha amalutshwane lalapho umuyi atholakala elele khona. Umntwana lo wathi nguye owaquma ibhanti umuyi azibophela ngalo ngengqamu wasemusa evulandini,” ngokutsho kwencwadi yamapholisa.
Lincwadi ibika ukuba kwatholakala ibhanti eliyi-blue ku-screen door.
Indaba le elusizi itshiye izakhamizi zakulindawo zidabukile njalo kukhona abanye okubikwa bakhuluma kunkundla yokuxhumana iWhatsApp bethi bacabangela ukuba umntwana lo angabe wabulawa.
