Online Reporter
Ethel Ncube
ABALIMI bakhuthazwa ukuba bavikele amazinyane emqandweni ngoba isikhathi somqando asikapheli.
UDokotela wezifuyo uDokotela Enias Ndlovu uveze ukuba kuliviki kuzabe kuqanda ngakho abalimi kumele babone ukuba amazinyane ahlala endaweni ekhudumalayo.
Ekhuluma lentatheli uMnumzana Enias Ndlovu ubike ukuba amazinyane kumele ahlale endaweni engangeni umqando njalo ekhudumalayo.
“Abalimi abanengi ngiyazi bazitshela ukuba umqando sudlulile kodwa kawukapheli ulokhe ukhona njalo ulakho ukutshiya ubulele izifuyo zethu ikakhulu amazinyane nxa singananzeleli.
“Abalimi kumele babone ukuthi amazinyane njengoba kugodola angahamba ayekudla bayawathinta bawavalele esibayeni esikhudumalayo. Kumele ubone ukuba isibaya sifulelwe, asingeni moya omnengi ukuze amazinyane angahlaselwa ngumqando.
“Lapho okulala khona amazinyane kumele kube yindawo eyomileyo njalo elomquba ukuze kukhudumale. Akumelanga alale lapho okulobumanzi khona ngoba alakho ukuhlaselwa yimikhuhlane etshiyeneyo kubangelwa yibumanzi,” kutsho uDkt Ndlovu.
Uqhubekele phambili eveza ukuba abalimi kumele bazame ngamandla wonke ukubona ukuthi amazinyane ayanakekelwa.
“Balimi ukuze umhlambi wakho ukhule yikuthi amazinyane uwanakekele kuhle angafi. Amazinyane kumele athole ukudla okwaneleyo abuye athole njalo amanzi ahlanzekileyo.
“Amanzi owanathayo kumele abeyiwo anathwa ngamazinyane akho. Nxa ufuya kumele ubone ukuba njengomlimi uyazikhangelela izifuyo zakho wehlise izinga lokuthumela abantu ukuthi bakwenzele lokhu lalokhuyana ukuze umhlambi ukhule ngoba obathumayo ngeke bakwenze kuhle,” kuphetha uDkt Ndlovu.
