admin
Listen Ndlovu
ABABONA ngezempilakahle yezifuyo abeVeterinary Services sebeveze ukuba sokuqhamuke umkhuhlane we-lumpy skin esigabeni seBinga esabelweni seMatabeleland North.
Ekhuluma lentatheli kaMthunywa uDokotela wezifuyo uPollex Moyo onguVeterinary Service Officer esabelweni lesi uthe sokulamaviki ambalwa izifuyo zendaweni le zihlaselwe ngumkhuhlane lo.
“Sokuqhamuke umkhuhlane we-lumpy skin esigabeni seBinga njalo sezizinengi izifuyo esezihlaselwe.
“Umkhuhlane we-lumpy skin wenza isifuyo sibe lamaqhubu aba sesikhumbeni senkomo njalo alakho ukudabuka abe yizilonda. Umkhuhlane lo utholakala kakhulu endaweni ezilamanzi njalo ezitshisayo,” kuchasisa uDkt Moyo.
Uqhubekele phambili esithi inkomo esihlaselwe ngumkhuhlane lo ibonakala ngokuvuvuka enyaweni, emkhonweni, emlenzeni lasebilweni.
“Ulakho ukumemetheka ubeyingozi nxa ungaba ngaphakathi ulandela ugqogqogqo, inkomo iyabe ingasenelisi ukuphefumula icine isifa.
Uxwayise abalimi abafuyileyo ukuthi baqalise ukuvikela izifuyo zabo emkhuhlaneni lo kulokuba balinde uze umemetheke ngoba ungabangela ukuthi balahlekelwe yizifuyo zabo.
Uthe abafuyileyo bangasondela kubodokotela bezifuyo abangabanika umuthi obizwa ngokuthi yi-lumpy skin vaccine ukuze bavikele izifuyo zabo.
“Nxa umfuyi angathola umuthi lo kumele azi ukuba ijekiseni eyodwa ihlaba inkomo eyodwa lokhu kusenzelwa ukuvikela ukumemetheka komkhuhlane lo ngoba umlimi engazi ukuthi yiziphi inkomo ezigulayo njalo lokuthi yiziphi okumele azihlabe kungakho kuyabe kungcono ukuhlaba zonke ezisesibayeni,” kutsho uDkt Moyo.
Uphethe ngokuthi umkhuhlane we-lumpy skin uthwalwa yizibungu okuthiwa yibudununu ezifana lemiyane. Uthe ukudibhisa inkomo kuyasiza ukuxotsha izibungu lezi.
Online Reporter