Kuqhutshwa iFootgolf Open eFolosi

The event is set to become an annual fixture on the golfing calendar, providing a platform for business networking, brand visibility and relationship-building through sport

Media Mpofu

IDOLOBHO leFolosi lizakwamukela abadlali be-footgolf abedlula ikhulu abalande ukuzoncintisana kuRegional Footgolf Open kusukela mhlaka 20 kusiya ku23 Lwezi.
Abaqoqi bomncintiswano bakhangelele ukuthi imidlalo ibemihle loba nje bekhalaza ngokusilela koxhaso lwemali.

Inhlanganiso yeZimbabwe Footgolf Association (ZFA) ibihlele ukuthi umncintiswano udlalwe amalanga amahlanu kodwa sekuzancintiswana phakathi kwamalanga amathathu. Isizatho salokhu yikusilela kwemali.

Umsekeli kamgcinisihlalo weZimbabwe Foogolf Association uSenzele Ndlovu, uthe asephezulu amalungiselelo abo njalo abadlali bawulinde ngabomvu umncintiswano.

Uthe okwakhathesi kulamazwe amathathu asebike ukuthi azabe ekhona eFolosi.

“Amalungiselelo omqhudelwano wethu weRegional Open asezingeni eliphezulu. Amazwe abalisela iSouth Africa, Zambia leNamibia aseqinisekise ukuthi azobe ekhona, kodwa sikhangelele ukuthi kuzabe kulamazwe amanengi njengoba kungumqhudelwano omkhulu,” kutsho uNdlovu.

Uthe sebebhadele imali yokusebenzisa inkundla ye-Elephant Hills Resort Golf Course.

“Akusoke kube ngumncintiswano kuphela. Kuzakuba lokufundisana lokwabelana ulwazi phakathi kwabadlali. Lithuba lokukhulisa umdlalo wethu kuleli,” kutsho uNdlovu.

IZimbabwe Footgolf Association isanda kuqeda ukuqhuba umncintiswano wayo wakuqala owasetshenziswa ukudinga abadlali abazakuya kuRegional Open. Kwancintisa abadlali abangu-66.