Online Reporter
Mthabisi Tshuma
IZAKHAMIZI zeBulilima District esabelweni seMatabeleland South sezizathola usizo olukhulu njengoba ukwakhiwa kwehofisi yeRegistry koNdolwane sekusondele emaphethelweni.
Ihofisi le kulindeleke ukuthi ithuthukise kakhulu ukutholakala kwemisebenzi kaHulumende kulindawo, ebalisela ukutholakala kwezithupha, incwadi zokuzalwa lamaphasipoti.
IBulilima District ilama-Ward angu-22 agoqela iTshankwa (1), Gwambe (2), Natane (3), Nyele (4), Matjinge (5), Gala (6), Masendu (7), Huwana (8), Makhulela (9), Bambadzi (10), Madlambudzi (11), Hingwe (12), Ndolwane (13), Malanswazi (14), Vulindlela (15), Dombolefu (16), Mlomwe (17), Somnene (18), Fairview (19), Dombodema (20), Ndiweni (21) kanye leKhame (22).
Ngokuvamileyo, izakhamizi zeBulilima zibhadala iR200 kusiya kuR400 ukuze zihambe ziye ePlumtree ukuyathola izithupha lezinye incwadi zeCivil Registry.
Lokhu sekwenze abanye abantu bekhule bengelazo incwadi eziqinisekisa ukuthi bayizizalwane zakuleli.
Ummeli weBulilima ePhalamende uDingumuzi Phuti uthe ukwakhiwa kwehofisi le kuveza ukuzimisela kukaHulumende weSecond Republic ukuletha imisebenzi kaHulumende eduze labantu.
“Ukuhanjiswa kwemisebenzi kaHulumende ezabelweni kuyaqhubeka ngaphansi kobukhokheli bukaMongameli Emmerson Mnangagwa.
Ihofisi yeRegistry koNdolwane izanceda izakhamizi ezivame ukuhamba ibanga elingaphezu kwe-120km zisiya ePlumtree ukuyathola izithupha lezinye incwadi eziqakathekileyo,” kutsho uPhuti.
Uthe ihofisi le izanceda ukuthuthukisa isiqinti sakoNdolwane njengoba izahlanganisa ezinye ingatsha zikaHulumende ezifana leze-veterinary, ezempilakahle, ezemfundo, inhlelo zabomama, ezokulima lezinye.
